England in an ram chanchin a vawikhatna atan FIFA Women’s World Cup final an khel dawn a. Australia lakah semi-final ah 3-1 in an chak.

Sydney-ah Lionesses hian a thlengtute mittui ti tla turin inkhel pawimawhah hnehna an chang a. Kum 1966 a mipa team in World Cup final an luh hnua an football team in World Cup final an khelh leh hmasak ber tur a ni.

An par vul ta

Kum hnih kalta khan England in hmeichhe football a manager tha, Netherlands team inlar pui a, Europe a champion pui tawhtu Sarina Wiegman an lalut a. A hnuaiah hmalam panin ke an pen chak.

Stadium Australia a inkhelah hian a thlengtu team in huaisen takin beiseina nei ngamin an mikhualte an hmachhawn. Mahse English team an kheltha a, inkhel a chungnung zawk niin hun pawimawh a danglamna siam hunah a che dik zawk an ni fo.

First half-ah England tan Manchester United midfielder goal khung thei Ella Toone chuan goal mawi tak kawh zetin a khung a, halftime hma zawng chu Lionesses an chungnung.

Second half-ah Australia an insiamrem a, an goal nawr a na. Star player leh captain Sam Kerr a hlauhawm a, danglamna siamtu niin minute 63-naah metre 23 a hla atangin an si phurh mawi takin a sut.

Mahse England an tlo. Australia nawr fovin a tawpah huntha an hmu. Tlarhnungah tihsual an neih atangin Lauren Hemp hmangin hma an hruai nawn a. Matildas in an si phurh sut leh teuh thin mahse minute 86-naah Alessa Russo chuan inkhel dahtha turin goal a khung belh leh a ni.

Pathianni final-ah England hian Spain nen a vawikhatna atana champion nih an inchuh dawn.

A vawikhatna atan nikumah Wiegman hnuaiah England hian European champion trophy an la tawh. A kum zawna hlawhtling turin rin an hlawh hle.

Coach Wiegman chuan, “Player a ni emaw, coach ang pawhin final a zawna vawi hnih thlen theih hi thil danglam a ni.” tiin a sawi a. 2017 Euro-ah Dutch team a champion pui hnuah 2019 World Cup final a hruai thleng bawk.

“Rinkaite an tla hma a, hei hian final luh theih ropuizia hi a tilang a ni.” tiin a sawi belh.