Democracy ram, a duh apiangin ram dan an zawm chuan political party an din mai theihna ram Indiaah kan awm a. Ram inkaihhruaina turah ngaihdan leh tum dan nei chuan chu a thil tum (political agenda) mipuite tana kalpui anih theih nan chuan political party an din phal a ni bawk. Hetianga party an din theihna hi multi party system democracy ram nawmna leh hlawhtlinna ber pawh a ni. India ram kan nih ang ngeiin party din a tul tih ngaihdan nei chuan kan ramah pawh an din mai a. Mipuiah a tlak nat loh chuan an zuzi ral leh mai bawk. A pawimawh ber chu mipuiin kan thlawp leh thlawp loh hi a ni.
Party hrang hrang lo ding tawhte hi kan hnam tan an la him hlawm hle a. Tunhma a hlauhawma kan sawi ber congress party pawh kan rin ang he hu a kan hnam ralna a lo ni lova. Hnam hrang hrangte chimral loha an awm theihna tura hma latu party an lo ni zawk a. Chutih rualin kan regional party te phei chuan mizo hnam din khawchhuahna an tuipui hlawm hle anih hi. Hetiang karah hian kum.1982 kuma din, hman lai atanga Hindu sakhaw betute chauh lenna rama India ram siam tumtu Bjp pawhin kan ramah kua a rawn hreuh thuk ta viau mai. Bjp hian tuna an thil tum lian ber chu India ah hian tuna an lalna hi kum 1000 chhung daih tir a, India chu Hindu lalram nghet em em a siam hi a ni. Leh lamah development hmathehin hnam tlem zawkte nek ral a, an sakhua Hindu chu vawn tir hi an thupui a ni a. Kan sakhua hi hnawk an tih hmasak ber a ni.
Thiam takin kan sakhua chu hnawk ti anga lang silovin christianity chu ramdang atanga lo lut ani tih te chu an rawn sawi ri zeuh zeuh tan a. Sakhaw intluk tlanna sawi reng siin Hindu sakhaw kalphung anga mipuite kaihhruaina dan an siam zeuh zeuh a. Kan inneihna dante chu sawrkar pawm loh inneihna danah min chhuah tep tawh a. Pathian hmaa kan inneihna chuan sawrkarah awmzia a nei miah lo dawn a. Sawrkar hriatpui awmze neia inneihna tur chu Hindu dan kha ani mai dawn a. Chu chu kristiante tan pawm rual ani lovang. Mahse, dan a awm si chuan kan zawm ngei a ngai bawk si ang. A lungchhiatthlak dawn hle a ni.
Hetianga zawi zawia min hnuktu bjp sawrkar chu central lam control tu, sum leh pai fawng vuantu an ni si a. Bjp thil tum leh duh dan haider a, an sum leh pai it a, an tih ang apiang lo sawimawi pawl pawh tam tak an awm ta. Kan state chhungah ngei mizo chhulchhuakte kaihhruaiin office changtlung tak an lo nei thei hial tawh a. Chu chang nilovin kan state a rorel lai party ngei pawhin be chhe ngam lovin an kaihhruai pawl NDA thlengin am lo zawm ve bawk a. Anni hian tunhnai khan mipui rilru thlirin manipur buai chungchangah NDA kan thlawp lo an ti a. Mipui an hlim hle anih kha. Mahse, anni hian parliament lama an thlawpna lai tak hi an la hnukkir lova. Hei pawh hi mipuiin kan thlir uluk a ngai hle. Duhthusamah chuan mnf general hqrs ngei hian an thlawp tawh loh thu hi ziakin mipui hmaah ngei puang thei se kan lung a dum ngei ang.
Kan tana hlauhawm leh hlauhawm lo hi mizote hian kan thliar thiam a ngai takzet a. Mizo thlahte tih zui tur an awm tawh loh theihna boruakin min chim mek a. Pathian au chunga rilru fim pu chunga politics thlir i thiam ang u.