Aizawl : Larsap Dr Hari Babu Kambhampati chuan Mizoram mi leh sa, India sipai huaisen 56 te chanchin tawi tar lanna ‘Bravehearts of Mizoram’ chu nimin khan a tlangzarh.
Banquet Hall, Raj Bhavan-a tlangzarh inkhawmah larsap chuan martar chhungte hnenah lawmthu sawiin, “An hmangaih kal ta te chu kan tana pasaltha, mihuaisen leh martar te an ni,” tiin, lehkhabu anga ram tana nun hlantute hming leh nihna tawi siam chu martarte chawimawina leh hriatrengna atana an bat leh tihmakmawh a nih thu a sawi.
‘Bravehearts of Mizoram’ lehkhabu hi larsap hian a hmalakna anga Raj Bhavan in a buatsaih a ni. Lehkhabuah hian Mizoram atanga India sipai a tang zinga maratr 56 te hming chu National War Memorial, New Delhi-ah tarlan a ni a. Mi pakhat hming leh nihna te hi War Memorial bang cheina leirawhchan (Brick) pakhatah zel ziah a ni.
Lehkhabu tlangzarh inkhawmah hian martar te chhung leh khat mi 20 chuang an tel a. Martar-te chhungte hnenah larsap hian lehkhabu a hlan theuh bawk.