- Ruata
Mahindra company chuan an #Futurescape showcase, South Africa-a Independence Day-a an neihah lirthei tam tak an phochhuah zingah Mahindra Thar electric hmang concept leh Scorpio N nghahchhana duan tur Pik Up concept an phochhuak tel a, concept chauh a la ni a, kum 2026 vela tihchhuah hman beisei a ni.
Mahindra Thar electric
Electric khawl hmang tur Mahindra Thar.e tia an vuah concept hi INGLO-P1 platform nghahchhana duan niin a body zang tha leh baterry daih rei tur chu an thil tum ber a ni a. A wheelbase pawh tiseiin 2776mm atangin 2976mm-ah a chho a, a khan a san zawk bakah a ke pawh a hlai zawk a, 5-door version-a duan a ni bawk a ni. Thar.e hi electric khawl hmang tur ni mahse kawng chhengchhia-a tlan (off-roading) lamah tha chungchuang tak tura duan a ni a, a theihna hrang hrang pawh tha leh sang thei ang bera duan a ni.
A design lamah chuan tuna kan hmuh mek internal combustion engine (ICE) khawl hmang nen hi chuan a inang lo viau mai a. Retro-styled design, rectangular grille, a hma bumper lian tha tak, windshield te fel at mai, Hummer te pawha kan hmuh ang bakah square LED DRL, a chung zawl tha tak, a ke lian tha tak bakah thil dang dang kan hmu nual dawn a ni. Mahindra hian China electric company hmingthang chu a Blade and Prismatic cells chawk luhnan an hmang dawn a. 4WD (four-wheel drive) system tha tak, a axle pahniha dual motor awm a nei dawn a. Hei bakah hian Mahindra hian an lirthei chhuak mek ho, electric version tur chanchin hrang hrangte pawh an puangzar bawk a ni.
Global Pik Up – Scorpio N nghahchhan pick up thar tur
Mahindra & Mahindra chuan Independence Day-a Cape Town, South Africa-a lirthei thar tur an phochhuahnaah hian Scorpio N nghahchhana duan tur pick up, Mahindra Global Pik Up an tih chu an phochhuak bawk a, khawvel puma Mahindra ngainatute duhdan uluk taka zirchiangin Mumbaiah he lirthei thar tur hi an duang a, hei pawh hi concept model a la ni a, a mawi hle a ni.
He Mahindra Scorpio N Pik Up concept hi kum 2025/2026 chhoa tlangzarh theih tura beisei a ni a. Gen II mHawk all-aluminium diesel engine, Scorpio N SUV-a kan hmuh mek ang hi a hman beisei a ni a. He khawl hi 2.2 litre diesel khawl a ni.
Mahindra Scorpio N pickup hi 4X4 system tha taka thawm niin driving mode hrang hrang – Normal, Grass-Gravel-Snow, Mud-Rut leh Sand te a nei ang a. Hmanraw changkang tak tak a kentel bakah himna hmanraw lamah pawh tunlai leh tha thei ang bera thawm a ni dawn a ni.
Scorpio N pickup concept phochhuah tak hi a lirthei ruangam chu Scorpio N kan hmuh mek ang hi a ni a. Hetah hian bumber tha tak, offroad accessory-a thawm kan hmu a. A design-ah erawh chuan a bonnet, bumper, wheel arch leh thil dang dangah khawih danglam niin a mawiin rim tak pawha hman tlak tur hmel a pu a. A ke pawh offroad tyre tha tak vuah a ni bawk a ni. A lirthei awm dan tur kimchang hi hriat vek theih a la ni lo a, khuareiah kan la hre chho zel dawn niin a lang.
Mahindra Scorpio Getaway tih hming pua chhuak thin Scorpio pick up hi India ramah pawh tihchhuah a ni a. Hei hi Scorpio hlui, tuna Scorpio Classic design nghahchhana duan a ni thung a. India ram pawh market hrang hrangah chuan Mahindra Pick Up tih hming puin a la chhuak reng a, leitu pawh an nei tha viau a. He lirthei neitu thenkhat, Australia lama nei te chuan budget Landrover tih te pawhin an sawi a, tha an tiin offroad adventure leh overlanding lama tui ten an nei nasa viau a ni.