Mizoram BJP thupuangtu, Lalremsangi Fanai chuan nimin khan Aizawl Press Club-ah thu thar thehdarhtute kawmin foreign-a hnathawk (house-maid)-a awm Mizo nula eng emaw zatin harsatna nasa tak an tawk mek a, chung mite chhanchhuaka Mizorama hruai haw turin BJP-in FIR an theh lut dawn tih a sawi.
Lalremsangi Fanai chuan Covid-19 lengin ziaawm lam pan a, nunphung pangngaia khawvel a inher rem mek hnuah Mizote pawhin state pawn leh ram danga eizawnna hlawk tur nia ngaiin chhungkaw harsatna vang liau liauin, awmpui hna (house-maid) thawk turin ram chhung leh pawnah tam tak an kal leh tawh a, heng zinga tam tak an talbuai mek niin a sawi.
Dubai, Oman, Syria vela Mizo hmeichhia buaina tawk mekten buaina an tawh chhan chu, Mizorama agent-te kawhhmuh leh a hmuna lo kawhhmuhtu, eizawn nana hmang awm leh chhawngte an nih thu a sawiin, “Mizo hmeichhia buaina tawk mekte tirtu leh kawhhmuhtu, Dubai hmuna agent pawh Burma mi, Zo hnahthlak a ni,” a ti.
“India passport leh visa nei lo, work visa nei lo, dan bawhchhe nghalin mi ramah kan lut a, kan intir lut a. Harsatna tawk thinten anmahni pui turin national party Mizoram BJP min au fo thin a ni,” Lalremsangi Fanai chuan tiin, a tul anga home ministry, external affairs ministry, India Embassy, Mizoram sorkar, DGP, DC te hnena an thlen thu te a sawi.
Tuna harsatna tawk tam takte chhanchhuak turin BJP chuan hma an la dawn a, naktuk (vawiin) hian foreign-a hna thawka awm Mizo hmeichhia harsatna tawkte tan Mizoram Police SP (Aizawl), SP (CID)-ah FIR an theh lut dawn tih a sawi a. “Central sorkar, Mizoram sorkar, party leh mi mal zarah mi eng emaw zat chuan dam takin Mizoram an lo kir thei a. Tuna harsatna tawk tam takte pawh an lo haw theih ngei kan beisei,” tiin, anmahni leh an chhungte pawh thlamuang taka awm turin BJP Mizoram thupuangtuin a chah.
State pawn mai ni lo, ram pawna hnathawka kal tur tan fimkhur a tul tih a sawi bawk.