Chinese leh Indian sipai commander-te chuan an inrinaa boruak sosang awm mek chu ‘tidaia muanawm leh reh taka awm’ turin an intiam.
Ram pahnih defence ministry chuan Thawhlehni zan khan thuchhuah inang siamin commander level-a inbiak vawi 19-na, Pathianni leh Thawhtannia neihah ‘a tha zawnga thil sawiin, insiam thatna tur awm leh thuk zawk thil sawiin’ ram pahnih inrina, Line of Actual Control thlang lam china boruak sa awm mek tihdaih an remti tih an tar lang.
Thuchhuahah hian ‘harsatna la awmte pawh a tahtawla ena siam that zel ni se tiin pawm a ni’ tia tar lan a ni a; mahse, khawi zawk zawk pawh hian a tawlh zawk nih an tumna an tilang lo ve ve.
“Tunah rih chuan lehlam lehlam hian ramri chhehvelah hian muanna leh boruak daih vawng turin an pawm a ni,” an ti.
Chinese Foreign Ministry thupuangtu, Wang Wenbin chuan Nilaini khan Indian army hmun, Chushul-Moldo khuaa inbiakna neiha thil tha tak sawi chhuah a ni chu a fak a, boruak a daih theih nana ‘inbiakpawhna tha tak a awm leh sipai leh ram palai kaltlanga inbiakna a awm chu a hlu’ a tih thu a sawi.
Line of Actual Control hi Chinese leh Indian awp chin Ladakh inrina a ni a. Khawthlang atangin India hmarchhak state, China-in a ram nia a sawi thin, Arunachal Pradesh thleng a kal.
India leh China hi ramria buaina avangin kum 1962 khan an lo indo tawh a. An ram chin nia an inchhal ve ve hi a takah an thunun loh lai a tam avangin an buaina ber pawh a ni.
India-in a sawi dan chuan an inrina hi km 3,488 a ni a; mahse, China lam chuan hei aia tawi daih hi an sawi ve thung.
China hian India-in a ram nia a chhal zinga sq km 90,000 zet chu a ram niin a chhal a, hetah hian India hmarchhaka Arunachal Pradesh pawh a tel a, he state hi Buddhist tamna a ni.
India pawhin China hian a ram chin sq km 38,000 zet a luah niin a sawi ve bawk a, hei hi Aksai Chin plateau an tih, India-a Ladakh hmun thenkhat niin tun hnaia an buaina ber pawh helai hi a ni.
Hetih lai hian China hian India hmelma kumhlun, Pakistan chu tanpuiin ram buai mek, Kashmir chungchangah India thenawm hi a tan ve tlat bawk.
Kum 1967 leh 1975-a India leh China indonaah khan mi tam tak an thi a. Hemi hnuah hian dan zawm tur zawm a ni a, ramria silai chelek loh tur tih pawh a tel a; mahse, zawm a hlawh tehchiam lo.
Kum thum kal taah khan Ladakh-ah hian an inbei leh a, Indian sipai 20 leh Chinese pali an thi a. He thil a thlen hnuah hian tlangram hmun chhengchhe takah hian boruak a tang zual a, lehlam lehlamin sipai tam tak an chhek a, laipui, tank leh indo thlawhna pawh an chhawp teuh ve ve a ni.
India leh China hian Pangong Tso dil hmar lam leh chhim lam te, Gogra leh Galwan Valley velah an sipai dahte chu tam tak an hnuk kir leh tawh ngei a; mahse, tun hma lama an dah zat aia tam fe chu an la dah ve ve tho a ni.
April thla khan Indian defence minister chuan China hian ram pahnihten inremna an lo neih tawh chu an bawhchhe nasa hle niin Chinese Defence Minister General Li Shangfu nen an inbiaknaah a sawi.
India hian China-in a sipai tam tak a chhawp te, na taka nawr tuma a intintuah te leh a che zeuh zeuh reng chuan ramri chungchanga inremna an lo neih tawh a bawhchhia niin a puh a ni.
Li hian New Delhi tlawhin Shanghai Cooperation Organisation-a tel China, India, Pakistan, Russia, Kazakhstan, Kyrgyzstan, Tajikistan leh Uzbekistan defence chief-te intawh khawm an neih laiin India hian heti hian a sawi a ni.