Aizawl : Higher & Technical Education Minister Dr R Lalthangliana chuan khawvel ramri khamin Zo hnahthlakte inunauna a daidang thei lo tih a sawi.
Sports & Youth Services Department leh Mizo Zirlai Pawl (MZP) tangkawpin Community Hall, Electric veng, Hnahthial-a ‘Youth-20 Meet on Nationalism, Patriotism and Development’ an buatsaiha khuallian, South Tuipui bialtu MLA ni bawk Dr R Lalthangliana chuan, nationalism awmzia chu hnam rilru put ringawt nhi lovin, ram leh hnam tana pen chhuah a, a taka Zo nunze mawi nupuia, chet chhuahpui a ni tiin, “Mahni mai bakah midang lainatna leh ngaihsaknate chu hnam hmangaihna dik tak a ni,” a ti.
Zofate zingah inpumkhatna a lian chho zel tih sawiin Dr R Lalthangliana chuan, “Khawvel ramri khamin Zo hnahthlakte inunauna a daidang theilo a. Thinlunga inkungkaihna leh a taka chet chhuahna chu ram leh hnam hmangaihna dik tak a ni,” tiin, Mizo nationlism-ah thanharh zual zel a tul thu a sawi.
South Tuipui bialtu MLA chuan Mizoramin hma a sawn zel nan leh hnam a boral loh nan zirna ngai pawimawh zual sauh a pawimawh tih a sawi a. Thiamna leh technology thang chak takah midang umpha ve tur chuan thiamna tak tak neih a tul tih a sawiin, “Zirna lama chimralna chuan hnam boralna a thlen thei a. Ram leh hnam dam khawchhuah nan thiamna tak tak neih a tul,” tia sawiin, Mizoram chhunga hna sang leh lian a dinhmun pawimawhte chu Zo hnahthlak thalai lehkhathiam ten an luah vek theih nan tan lak a pawimawh thu a sawi bawk.
He hunah hian Speaker Lalnuntawma Fanai, Adviser, MZP General Headquarter leh MZP President Lalnunmawia Pautu te’n thu an sawi bawk.