Aizawl: Rorelna dik duhtute team chuan nimina khan Aizawl Press Club-a chanchinbumite an kawm a, state pawna buhfai lei aiin rice mill tam zawk buna central sorkarin a tumpui theih tur buhhum lei chu ram tan a tha zawk tih an sawi.
Rorelna dik duhtute team zinga mi, Lalrammawia chuan central sorkarin buhhum leina hi a tumsak thei a, hei hi Rajya Sabha MP K Vanlalvena’n bawhzuiin sorkar laipui pawhin ram chhunga buhhum leia Minimum Support Price pek an inhuam thu leh allotment an hmuh ang chu a man re-imbursed an pek theih chu April 12, 2023 khan lehkha a rawn thawn tawh tih a sawi a, hetihlai hian beiseina sang tak neia an thlir laia hmalakna a awm lo chu pawi an tih thu leh chak taka hmalak an duh thu an sawi.
Lalrammawia chuan buhhum lei hi sorkar laipuiin a tumsak theih dawn avangin hmun dang atangin lei pawh ni se tuna buhfai lei ai chuan sorkar tan pawh a tha zawk dawn tih a sawi a, hetihlai hian sorkarin buhfai a la lei tlat chhan chu tute emawin hlawkna an hmuh vanga kalpui nia an hriat thu a sawi.
Assam sorkar pawhin buhhum chu leiin a her a, Mizorama buhhum thenkhat pawh Assam-ah her a awm nia an hriat thu sawiin, Mizoramin buhhum a her theih nia a thleng dawn tih an hriat avangin Cachar district-ah rice mill pawh pahnih bun thar a tum mek nia an hriat thute a sawi.
Rorelna dik duhtute chuan Decentralized Procurement scheme hi state 15 lai chuan kum 2015 atang khan an kalpui tawh a, central sorkarte nen MoU sign-in hma an lo la tawh tih an sawi a, he scheme chungchangah hian Mizoramah pawh hmalakna a awm nual tawh thu te, chief minister pawhin 2022 khan he scheme kalpui tur hian file-ah a ziak tawh a; mahse, tihpuitlinna tak tak a awm lo tiin, ram chhunga lo neitute tan tha tur, buh thar lam zawk mipuiin an ei theihna turin buhhum leia her ve chu a tul tak zet tawh tih an sawi a ni.