Turkey rama Black Sea hnaih province hrang hranga tui lian avanga thi chu mi 70 an thi ta a, chhanchhuah hna thawktute chuan mi chin hriat lohva awm mi 47-te an la zawng mek tih thuneituten an sawi.
Kar hmasaa tui lian hian chenna in leh mihring bakah khawlaia lirthei a la nasa a, khawlaiah bawlhhlawh tam tam tak a chhawp bawk a. In lian tak tak leh lei a tichhia a, kawng a ping a, electric pekna a chhe nasa hle bawk.
Kastamonu province-ah mi 60 an thi a. Sinop-ah pakua leh Bartin-a mi pakhat an thi niin Disaster & Emergency Management Directorate (AFAD) chuan Thawhtanni khan a sawi.
Kastamonu leh Sinop-ah hian mi 47 an la bo bawk.
AFAD chuan mi 8,000 vel, ui fing 20 nen chhanchhuah leh chhawmdawl hna thawkin an awm mek tih a sawi.
Kastamonu province-a Bozkurt khua chuan an tuar na hle a, drone hmanga thla lakah pawh a lang chiang hle a, rescue team-in in chim thianin dam chhuak leh ruang an zawng mek.
Chhiatna thlen nasat zualnaa cheng mi 2,000 chuang chu helicopter leh lawngleng hmanga thiar chhuah an ni tih AFAD chuan a sawi a. Khaw 40 chuangin power an la nei lo bawk.
Khawchin zirtute chuan Black Sea hnaih province leh khawchhak lam inkarah Thawhtanniah ruah tam tak a la sur avangin tui a la lian zui thei niin an sawi.