Liverpool chuan German club VfB Stuttgart atangin Japan midfielder Wataru Endo chu lakluh tumin inbiakna ngawrh takin an kalpui.
Kum 30 mi hian season liamta khan Bundesliga-ah vawi 33 inkhelin goal nga a khung bakah assist vawi li a nei a. Stuttgart hian table mawng lama tlak loh hram tuma an beihna kawngah an player pawimawh a ni.
Reds hian Ecuador international Moises Caicedo chu lei tumin manto takin dawr mahse Chelsea zawm a thlang zawk a. Southampton atanga Belgian midfielder an ngaihven rei tawh tak Romeo Lavia pawhin Chelsea a thlang zawk.
Tun nipuiah Fabinho, Jordan Henderson leh James Milner te bakah Naby Keita leh Alex Oxlade-Chamberlain te an chhuahtir avangin nasa takin an midfield thuam that a ngai a. Player langsar pahnih la tawh mahse defensive midfielder an la duh belh.
Japan tana vawi 50 inkhel tawh Endo hian kum 2019 khan Stuttgart hi a zawm a, an tan match 133 a khel tawh.
Stuttgart hian season hautak hmang mahse Bundesliga in player che thate a tehnaah season liamta khan Endo hi a che tha viau a. Tlan taimak kawngah leh ball inchhuhsakah te a sang hle.
A man zat tur hi puanzar la ni lo mahse Liverpool hian Pound maktaduai 15.5 vel an seng dawn nia ngaih a ni.