Indonesia-a Mount Semeru chu nasa taka a kang irh chhuakin an rama mihring chen tam berna thliarkar, Java chung lam km 5.6 vel chu a khuin a bawh khat.
Tlang kang avang hian inthiar chhuah ngai khawp erawh a la ni rih lo va, thi pawh an la awm lo.
National Disaster Mitigation Agency (NDMA) chuan tlangpanga chengte chu tlangkang inirh zel a awm theih avangin inring tur erawh chuan an ti.
Video atanga a lan dan chuan metre 3,676 (12,060ft)-a sang tlang kang atang hian chenna in tam tak chung zawnah mei khu a inzam nasa hle.
“Lumajang huam chhunga Sumber Mujur leh Curah Koboan khaw chung zawnah chhum lum chhah tak a awm,” tiin tual chhunga thuneitu pakhat, Thoriqul Haq chuan a sawi.
Curah Kobokan luipui kama chengte chu tun hnaia ruah sur leh tlanga tlang tikang thei thil awm sa inchawhpawlh avangin tlang kang atanga lei invawrh chhuak, vawt tak tak a awm an lo ring lawk.
Mount Semeru hi an ram sanaa Inrinni tlai dar 5:24 (India-a tlai dar 6:04)-ah a kang a irh chhuak tan niin thuneitute chuan an sawi.
Indonesia hi Pacific ‘Ring of Fire’ an tih, tectonic plate intawhna laia awm a ni a, tlangkang a tam a, lirnghing pawh a thlen duhna lai a ni.
Semeru hi ‘The Great Mountain’ tiin an sawi thin a, Java-a tlangkang zinga a sang ber leh tun thlenga la kang thin a ni a. Hetih rual hian Indonesia-ah chuan khualzinten kea lawna an tlawh tam ber hmun a ni ve bawk.
December thla maiah pawh khan a kang hi a lo irh chhuak tawh a, mi 550 chuang hmun himah sawn an ni.
Indonesia hi Pacific ‘Ring of Fire’ an tih, tectonic plate intawhna laia awm a ni a, tlangkang a tam a, lirnghing pawh a thlen duhna lai a ni.
Tunah pawh hian tlang kang mek (active volcano) pawh a la awm awm nual nghe nghe a. Lirnghing pawh lian tham lo an tuar deuh reng bawk.
Kar liam ta chhung phei kha chuan Indonesia hian chhiatna lian tak tak an tawk nasa hle a. Ruah tam tak sur avangin lei nasa takin a min a, Sulawesi thliarkarah lir na tak a nghing a, a hma lawkin mi 62 phur Sriwijaya Air Boeing 737 chu a tla bawk.