Robert Romawia Royte chuan minister of state a nih ve chhungin a department enkawl pathum – ICT, SYS leh tourism department-in state budget pawn atanga an thawh chhuah zat belhkhawm chu Rs nuai 7,34,930.79 a nih thu a sawi.
Aizawl Press Club-ah nimin khan thu thar thehdarhtute kawmin Robert Romawia Royte chuan, “Minister of state ka nih ve chhung tun kum li (2019-2023) leh thla riat chhung hian state budget atangin hmasawnna thawhna tur sum kan nei lo a. Hei vang hian DPR tam tak kan siam a. Pathian zarah hmasawnna hnathawh nan state budget pawn atangin ka department chan pathumte thawhchhuah zat belhkhawm chu Rs nuai 7,34,930.79 kan thawk chhuak ve a ni,” a ti.
Robert Romawia Royte sawi danin, a department enkawl, ICT-ah state budget estimate chu Rs nuai 2,717.17 niin, state budget pawn atanga thawh chhuah zat chu Rs nuai 9,671.57 a ni a. SYS depat budget estimate Rs nuai 13,283.55 niin, state budget pawn atanga thawh chhuah zat chu Rs nuai 51,183.94 a ni a. Tourism-ah state budget estimate chu Rs nuai 5,590.08 a nih laiin, state budget pawn atanga an thawh chhuah zat chu Rs nuai 12,638.28 a ni.
PMJVK scheme atanga sum hmu tur hian Mizoram sorkara nodal department-in department hrang hrangte DPR CS chairman-na hnuaia state level committee-in a pawm hnuah dan ang thlapin central sorkar (MMA)-ah theh luh a ni a, dan anga endik tu tur line ministry ten an pawmpui let te chu dan ang thlapin MMA-a empowered committee-in a ngaihtuah hnuah a pe chhuak thin tih sawiin, “Mi thenkhatin PMJVK chungchanga thu dik lo an sawi fo a. Tunah chuan an sim tawh niin a lang,” a ti.
PMJVK scheme hnuaiah Mizoramin dan ang thlapa pawisa sanction a hmuh ang zelin a takin hma ala tih sawiin Robert Romawia Royte chuan, “Tunah hian zaa 50 chauh sum la hmu chungin zaa 65 (a pumpuiah) vel hna zawk tawh a ni,” tiin, ministry-in state pathum sum dang a pek chhuah belh tur leh project thar ngaihtuah tura a thlan zingah Mizoram a tel thu a sawi.
Sports minister hian kum 2018 MLA inthlanpuia an party manifesto angin Mizoram State Sports Policy chu an sorkar atanga kum khat ral hmain an peih fel tih a sawi a. He policy avang hian DPRs siam te chu a hlawhtling duh hle tih a sawi a. India rama a vawi khat nan Mizoram sorkar chuan sports chu Industry nihna a pek thu te, infiammi thiam bik te pualin Group B hnuai lam hna ngheta direct recruitment zaa 5 hauhsak an nih thu te, lehkha zir chunga infiammi thei bikte training-na tur Residential Sports School pawh zaa 70 vel zawh tawh a nih thu te leh sports school pawh hmun ngaah sak mek a nih thu a sawi.
Tun sorkar kal lai mek chhung hian football khelhna tur bik phullem field sak tura ruahman 30 zet zinga 21 hi Sports dept hmalaknaa thawh a nih thu leh 14 sak zawk tawh niin, pasarih thawh mek a nih thu a sawi a. Mizoram Sports Policy-in a sawi angin sports complex pathum sak mek a nih thu leh SYS dept-in hostel pali a sak mek a nih thu leh CSR kaltlangin Lengpuiah moto-sports racing track siam mek a nih thu a sawi bawk.
Infiamna tihhmasawnna kawngah nasa taka hmalak a nih thu sawiin, tun sorkar kum li chhung hian International-ah gold medal 22, silver medal 9 leh bronze medal 21 lak a ni tawh a. Nationalah Gold medal 105, Silver 63 leh Bronze medal 76 lak a nih tawh thu a sawi a.
Tourism department in hmasawnna a neih te sawiin, Heritage Tourism lamah hmalak niin Mizote’n zalenna an sual dan history buaipuiin ‘Meet the heroes, Peace Pays’ tih thupui hmangin programme buatsaih a ni a. Sorkar hmasa hna chhunzawmin Thenzawl Golf Resort hnathawh leh Reiek area-a hnathawh te chhunzawmin tihpuitlin a ni a. Thenzawla Wellness Spa pawh bul tan tharin tha taka zawk a nih thu a sawi.
NESIDS scheme atangin Reiek huam chhunga tourism infrastructure siam belh a nih thu te, kum eng emaw zat chhung lo chawlhsan tawh Anthurium festival chu kum 2019 atanga neih leh tan a nih thu leh MNF party manifesto-a ziah angin Ziafte insuih chu sorkar ngaih pawimawh a nih angin, kum 200 tirah Zampuitlang (Vanghmun) leh Churachandpur ah Insuihkhawm Zo Kutpui buatsaih a nih thu te leh Mizoram Resposible Toursim Policy, Acts leh Rules te siam fel a nih thu a sawi bawk.
ICT hmalakna kal mek thenkhatte sawiin ICT Minister hian, Mizoram chhunga mobile service la awm lohna khua 66 tuam turin mobile tower 60 din tura hmalak a ni a, heihi kumin chhunga zawh hman tura ruahman anih thu a sawi a. Mizoram puma hman turin 5G chu Aizawl-ah pek chhuah tan hmasak phawt a niin, khawpui dangah pawh a tahtawla hmalakzui zel a nih thu te, thingtlang zirna school 20 ah smart classroom kalpui niin Kuly 2022 khan zawh fel a nih thu te a sawi bawk.