Aizawl: Aizawl East II bialtu MLA Robert Romawia Royte chuan an party-in MLA seat tam zawk an lak theihna tura an hotute ruahman angin, Hachhek bialah a ding dawn tih a sawi.
Nimina Aizawl Press Club-a thu thar thehdarhtute a kawmnaah Robert Romawia Royte chuan a bial Aizawl East II chhuahsana Hachhek biala a din tur chungchangah zawhna a dawng tam hle tih sawiin, “MNF-a kan hotuten khawthlang lamah ka tangkai theih an rin vang leh seat tam zawk kan lak phahna a nih an beisei vang a ni. Hotuten an tih si chuan ka pawm lo thei lo,” a ti.
Minister of State Robert Romawia Royte chuan a dinna bial turah tan lak a ngai dawn hle tih a sawi a. “Pathian leh bial mipuite duhsakna ka mamawh bik dawn a. Hetih lai hian, ka bial chhuahsan tur Aizawl East II chu MLA leh minister-a min siamtu a nih avangin ka thlahthlam lo ang,” tiin, a bial chhuahsan turah chuan candidate tha tak an hotuten an dah dawna a hriat thu leh theihtawpa tan lak a tum thu a sawi bawk.