Aizawl: Indigenous Tribal Leader Forum (ITLF) leh Union Home Minister Amit Shah-te tun hnaia an inbiaknaa an thurel zinga pakhat Lamka (Churachandpur) leh Lengpui Airport inkara helicopter a service theihna atan hmalakna kalpui mek a ni.
Central sorkar chuan Churachandpur leh Lengpui inkara helicopter service a remtih angin, August 17, 2023 khan pilot pahnih – Capt. Bipin Bonde leh Capt. NS Panwar-te chuan Churachandpur atangin Lengpui Airport-ah helicopter an rawn tumpui chhin. Chawhma dar 11:20 velah rawn tumin, dar 11:30 velah Churachandpur an pan leh nghal.
Capt. Bipin Bonde leh Capt. NS Panwar-te hian thuneitute hnenah report an thehlut ang. Pilotte hian Churachandpur leh Lengpui Airport inkara helicopter service thei tura an ngai a nih chuan helicopter service tura buaipui ngai hrang hrangte buaipui nghal a ni ang, peihfel a nih velah helicopter service tir a ni ang.
Helicopter service hi a rem a nih chuan Global Vectra Helicopter Ltd. ten buaipuiin, VTGVA/BELL 412 (Helicopter) a service ang.