Aizawl: MNF party chuan Aizawl North II bialtu MLA Dr Vanlalthlana MLA fund hman danah eirukna inphumah ngai.
MNF Media & Publicity department-in Inrinni khan Aizawl Press Club-ah thu thar thehdarhtute an kawm a. An General Secretary VL Krosshnehzova chuan ZPM MLA Dr Vanlalthlana’n ‘Corruption do turin kan inpeih tawh a, a ngaihna pawh hre turah kan inngai,’ tiin ZPM office-ah a sawi nia sawiin, “Hetianga huai taka a sawi mek lai hian Dr Vanlalthlana hian a MLA fund a hman danah hian eirukna leh hlemhletna mai bakah dan bawhchhiatna a inphum ngeiah MNF chuan kan ngai,” a ti.
Dr Vanlalthlana hian a fund chu veng aiawh tura mipui thlan local council-te kutah a dah mang lo nia sawiin VL Krosshnehzova chuan, “Local council-te kuta a dah chhun pawh ZPM Unit leh thalaiten an thawk tlangpui,” tiin, MLA fund party-in an thawh phal a nih loh laiin ZPM party deuh hlir a thawh tirah a puh.
“Aizawl North Development Agency din chawpin party mite a vur hem hem mai a ni,” tiin VL Krosshnehzova chuan mipui sorkar din tum inti, chumia au ring ber chuan dan lo angin fund hi a hmang mek tih a sawi a. MLA fund-a ZPM Block hruaitute leh a agency din chawp hmanga hna a thawh thenkhat phei chu a man nen a inphu lo hlawm hle tih a sawi.
VL Krosshnehzova chuan MLA fund chu a hman dan turah party tana hman phal ni lo mah se, Ramhlun North ZPM Unit II-a president nilai, C. Lalmalsawma chuan, ‘Keiniah chuan cheng khat pawh hi mi mal account-ah a luh belh lo a, party-ten kan party tihchak nan kan hmang ve a chu zawng chu a ni mai e,’ tiin social media (Whatsapp)-ah chiang takin a post a. Hei hian dan phal lohin an MLA hian ZPM party unit hi MLA fund a pe ngei tih a lantir chiang hle tih sawiin, “A unit president ngei hian Dr Vanlalthlana hi party duhsak nan chuan dan pawh bawhchhe hreh lo a nihzia a puang chiang hle a ni,” a ti.
VL Krosshnehzova sawi danin MLA fund hman dan chungchangah leh implementing agency chungchangah hian Aizawl North II MLA hian Whatsapp group pakhatah, ‘Society hi sorkarah registered thlap a ni a. MLA nen MOU kan sign thlap a, chanchinbuah pawh kan chhuah thlap e. MLA fund a hna thawh a nih dawnin implementing agency tur ngaihven zel a ngai thin a, LC te emaw NGO te biak kual a, an remchan theih dan tur ngaihtuah a ni thin. |henkhat phei chuan seal hman manah zaa pahnih atanga zaa pathum te an la thin a, a uiawm thin viau mai. A awlsam zawk nan leh felfai zawk a hma lak a nih theih nan agreement awm thlapin kan thawk dun a ni,’ a ti.
MNF Media & Publicity department chuan Aizawl North II bialtu MLA chu heng zawhnate hi chhang turin an phut:
1) MLA fund thawk tura implementing agency atana a hman NGO emaw LC te emaw hian a hna tak tak hi an thawk ngai lo em ni? Tute nge a hna tak tak thawk thin? Tunge a hlawkna tel thin?
2) Eng vangin nge Implementing Agency ni chunga seal hman man hi an lak? Tu hnen atangin nge an lak a, tuin nge pawisa chu pe?
3) Seal hman man latu NGO leh LC te hi tute nge?
4) A chunga ZPM Unit President thusawi atang khian Implementing Agency a MLA-in a hman thinte hian hna hi thawk loin ZPM Unit ho hlir hi a thawh tir thin zawk a ni em?