Canada-a British Columbia province-a hmun 400 dawnah ram kang mekin chhungkaw 30,000 vel zet an awmna chhuahsan tura thu pek an ni.
Thuneitute chuan tuipui kama mi 1,32,000 zet chenna, Kelowna khawpuia zin luh pawh an khap a. An khaw bula ram kang nasa tak chuan Lake Okanagan kal kânin mei khuin a bawh nasa lutuk an ti.
Ram kang hian a bul hnai, mi 36,000 chenna, West Kelowna khawpuia in eng emaw zat a kang chhe tawh.
Kamloops, Oliver, Penticton & Vernon leh Osoyoos khuaa luh pawh khap mek a ni.
Heng hmun atanga hmar lam mel sang chuanga hlaah pawh ram nasa taka kangin Yellowknife khawpui a hnaih mek zel bawk.
Thuneitu sangin Canada-a Northwest Territories khawpui chhuahsan tura thu a pek tawp chu Zirtawpni kha a ni a, insaseng an tam hle a. Tual chhung thuneitu sang pakhat chuan mi cheng zawng zawng deuhthaw chu lirthei leh thlawhnain khawpui an chhuahsan thu a sawi.
Mi 20,000 vel chenna khawpuiah hian mi 19,000 vel an chhuak tawh a. Thuneitute chuan Zirtawpni zanah khan damdawi ina damlo awm mi 39 chu hmun dangah an sawn thu leh anni hi insawn chhuak hnuhnung ber an nih thu an sawi.
Environment & Communities Minister Shane Thompson chuan mi thenkhat chhuak duh lo an awm tih an sawi a, an duh dan ber erawh hum himah kal ngei se tih a nih thu a sawi.
British Columbia-ah hian Zirtawpni khan chhungkaw 15,000 hnenah insaseng tura tihna thu pek a ni a, Inrinni zanah chuan chhungkaw 30,000 vel hnenah an pe tawh a. Chhungkaw dang 36,000 chu che chhuak tura inring turin an ti bawk.
Emergency Management Minister Bowinn Ma chuan thuneitute hian ‘an theihtawpa nain insawn chhuak tura tihna hi an kalpui’ niin a sawi.
“Thih leh dam inkar thil a ni a, mihring tan mai ni lovin an thil neihte tan pawh a ni,” a ti.
Province Premier David Eby chuan insawn chhuak tura tih hi chhungkaw 35,000 an ni tawh a, chhungkaw 30,000 dang inring turin an ti bawk tih a sawi.
Canada hian ram kang a tawn hun thina a nasat ber tum an tawng mek a, Canadian Interagency Forest Fire Centre (CIFFC) chuan hmun 1,000 velah ram a kang mek niin an sawi hial.
Mi thiamte chuan sik leh sa inthlak nasa lutukin khaw lum leh ro a siam nasa a, hei hi ram kang tura remchang a tam phah hle niin an ngai.
Khaw lum uchuak tak, awh rei bawk si a tam telh telh a, lei lam a ro em em zel a, hei hian ram a tikang awlsam em em thin a, a kan tawh chuan a inman kai chak em em zel bawk a, thli a thawn phei chuan a inman kai chak lehzual thin niin an sawi.
Tun thleng hian thi leh hliam erawh an la awm lo hlauh a ni.