Hnahlan Grape Farming & Processing Coop Society (HGFPCS) Ltd leh North East Wave (NEW) tawngkawp buatsaih Hnahlan Winery-a Grape Festival – The Grape Escape chu Inrinni khan Champhai North bialtu MLA Dr ZR Thiamsanga’n a hawng.
Grape Festival – The Grape Escape hi sorkar laipuia Tourism Ministry hriatpuia SEDP suma buatsaih a ni a. Tourism Ministry-a Regional Director Anil Oraw pawhin he kut hi a hmanpui a ni.
Grape Festival – The Grape Escape hi tualchhunga Grape chin leh tualchhung siam Wine bakah Wine tourism leh Agro tourism te chawilarna tura ruahman a ni a. Kum 2019-2023 chhunga Hnahlan Winery-a grape hralh tam te hnenah Farmers Award sem niin, chawimawina thuziak hlan theuh te an nih bakah pakhatna C. Lalrampara hnenah Rs.5000; pahnihna C. Vanlalhriata hnenah Rs. 4000 leh pathumna V. Lalthlamuana hnenah Rs. 3000 pek a ni.
Festival hawngtu Dr ZR Thiamsanga chuan Grape Festival ‘The Grape Escape’ chuan kuthnathawktute eizawnna kawngah nghawng tha a neih ngei a beisei thu a sawi a. Horticulture, Argiculture, Rural Development leh department dang te pawhin Grape chingtute an lo duhsak thinnaah lawmthu sawiin, an hmalakna hrang hrangah lo pui zel turin a ngensak.
Grape chin chu eizawnna a tlin thu sawiin ZR Thiamsanga chuan Grape chingtu kuthnathawk te pawh thahnemngai taka hma la chhunzawm zel turin a chah a. Mamawh an neih te pawh ngaihvensak zel a tum thu a sawi bawk.
Tourism Ministry-a Regional Director Anil Oraw pawhin The Grape Escape chu Mizorama Wine industry leh Tourism lama hmasawnna pawimawh nia sawiin, sawiin a buatsaihtute a fak a. Sorkar laipuia Tourism Ministry hnuaia India rama Tourism hmasawnna tura project lian Swadesh Darshan 2.0 ah Champhai district-ah Wine Tourism kalpui a nih tur thu sawiin, hemi atan hian sum pawh sanction fel a nih tawh thu a sawi.
Hnahlan Winery-a Wine siamtu Catherine Rosangzuali’n a sawi danin, Hnahlan Winery chu kum 2007 a bultan niin, Hnahlan leh a chhehvel khuaah te Bangalore Blue Grape variety an ching a. A tirah fortified wine siamin, tunah hian fermented wine Isabella an siam leh a. Kum 2019 khan Grape quintal 480, 2020-ah quintal 630, kum 2021 ah quintal 500, kum 2022 ah quintal 1500 leiin, tun kum kalmek ah hian quintal 989 an lei tawh bawk.
Hnahlan Winery-ah hian fermentation tank 22 (11,000 litre theuh) awmin, a capacity 2,42,000 litres a ni a, Grape quintal 200 lenna cold storage an nei bawk a ni.