Hurricane Hilary-in Mexico-a Pacific tuipui kam leh California a pan mek a, a chakna nasa takin hloh tawh mah se ‘nunna atana hlauhawm khawp tui lian’ a la thlen thei tho dawn niin US meteorologist-te chuan an sawi.
Darkar khata km 140-a chak thlipui keng hi tunah chuan Category 1 storm-ah a tlahniam tawh.
Hilary vang hian Mexico-a Baja California peninsula leh US chhimthlangah chuan Inrinni zan zankhuain ruah a sur.
Baja California-ah lui tê kân tum pa pakhat chu tuiin lain a thi niin thuneituin a sawi.
He pa hi car-in a fate pathum leh hmeichhia nena an ni a, mi dang hi chu an dam vek niin tual chhung chanchinbuten an tar lang.
Hilary hi California chhim lam a luh hmain tropical storm-ah a tlakhniam hman rin a ni a. Kum 80 chuang hnua tropical storm-in California-in a nuai leh hmasak ber a ni ang.
US National Hurricane Center (NHC) chuan India sanaa Pathianni chhun dar 11:30 khan Hilary hi Baja California chhim tawp, Punta Eugenia atanga km 145 vela hlaah a awm mek niin an sawi.
An ram huna Pathianni zing (India-a tlai lam)-ah Baja California peninsula khawthlang laili a lut ang a, Pathianni chawhnu (India-a zan lai pelh)-ah California chhim lam a lut zui dawn niin NHC chuan a sawi.
NHC-a senior hurricane specialist John Cangialosi chuan, “Hilary hian rang takin a chakna a hloh niin a lang,” tiin Associated Press news agency chuan Inrinni khan a sawi.
A tirah chuan Hilary hi dakrar khata mel 130-a chak thlipui keng, Category 4 storm a ni.
California chhim lam leh Nevada chhim lamah chuan ruah inches 10 vel thleng surtir thei tur niin NHC chuan Pathianni khan an sawi a. “Tui lian hlauhawm tak a thlen a rinawm,” an ti.
National Weather Service (NWS) chuan a hmain San Diego-ah chuan sabereka khuangkaih a thleng thei niin an sawi lawk a. US chhimthlang lam state, mi maktaduai 26 vel chenna hi tui lian thei dinhmunah a ding mek.
Zirtawpni khan US President Joe Biden chuan Federal Emergency Management Agency (Fema) chu ‘an mite leh mamawh pe chhuak tura an inrin thu’ a sawi.
“Storm kalna tur kawnga awmte chu inring tur leh sorkar leh tual chhung thuneituten kaihhruaina an siamte zawm theuh turin ka ngen a ni,” a ti.
Mexico-a hmun thenkhat pawh tropical storm thleng tur hi ngaihchan niin sorkarin che chhuak thei turin sipai 18,000 a inrintir.
Storm thawk tur avang hian California chhim lama Major League Baseball inkhel tur pathum chu a hun sawn a ni a, California laili tuipui kam atanga SpaceX-in an rocket an kah chhuah tur pawh Thawhtanni thleng thulh rih a ni.