A pasal Sam Asghari-a’n an nupa inthenna a puan hnu-a a vawikhatna ni turin Britney Spears a tawngchhuak a, ‘Ka tuar thei tawh lo’ a ti.
Mr Asghari (29) hian Los Angeles-a inthenna thu a thehluhnaah an inkar tihfel theih a ni tawh lo, a tih rualin, Britney hnen atangin sum leh paia support-na a beisei tur thu a tarlang tel.
Ms Spears (41) chuan kum 6 an inzui hnu-a thil lo thleng chuan a barakhaih ve angreng tho mai nia sawiin, Asghari nena an inkar lo tawp ta mai chuan tlema a barakhaih thu a sawi.
“Engvanga heti ang thil lo thleng ta mai nge a nih thu sawi tura helai hmuna lo kal ka ni lova, dik taka sawi dawn chuan midang lo inrawlh ve na tur chi pawh a ni lo.
“Ka rilru chhung ril tak tarlang theih turin rilru hrehawm leh ka mittui te hi phochhuah duh viau mah ila, chhan hrang hrang vangin ka chak lohna te hi tunhma atang tawhin ka thup hram hram thin,” tiin instagram-ah a ziakchhuak.
Hetih lai hian, nupa inthenna lamtluang khirkhan leh harsa angreng tak zawh chho mek mah se, chak tak leh huai takin a awm reng a, ngaihtuahawm dinhmunah taksa leh rilru ang pawh a awm loh thu a sawi tel bawk.
Tarlan tawh angin, Britney Spears leh a pasal Sam Asghari te 2016 khan ‘Slumber Party’ music video shooting neih laia intawng an ni a, Iranian-American actor, model leh fitness trainer ni bawk Ashgari hian karhmasa mai khan inthen a duh thu court-ah thlenin, an nupaa an awm hranna pawh a thla tel a nih tawh thu a tarlang.