India hmar lam hmawra awm Kashmir state chu kum 1947 atang khan India, Pakistan leh China ramri a awm ani chungin 1952 a India hnuaia dah fel a ni a. Kashmir awpna atan hian India chuan a constitution chu khawih danglam in India state dangte ang lo takin Kashmir tan hian dan hranpa a siam a. Constitution article 370 ah Kashmir awpna dan chu dahin he dan hnuaiah hian a hranpa in flag a nei thei a. A ram chhungah dan bik neiin an state chhung in awpna bik tam takah central sawrkar chuan thu a nei lo a ni. He dan hmanga an in awp avang hian central sawrkar chuan tih theih loh tam tak a nei a. An duh thala Kashmir an control theih loh avangin Bjp sawrkar chuan 2019 khan Kashmir chu Union territory ah dah thutin an state dan bik art 370 chu parliament in a thiat ta hmiah mai a. Kashmir chu awpbeh ngheh an ni a. Tunah chuan Kashmir chu central sawrkar chuan a duh duhin a sawp kual thei ta a ni.
Mizoram pawh hian Kashmir inawpna chu tluk phak lo mahse 1986 a India leh mnf te inremna angin art 371G ah dan tesep zeh tel a ni a. Kan tan bik hian kan sakhua leh hnam dan bikah India dan chu mizoram lagislative assembly in a pawm ve kher loh chuan hman theih ani lovang tih a awm a. Art 371 G hian kan ram leh hnam hi a veng a ni.
Inrinni 18.8 2023 khan Aizawlah Centre for environment protection and social justice chuan tunhnaia parliament a pawm tak Forest conservation and biological diversity amendment Act 2023 chungchang zirchianna hun an buatsaih a. He hunah hian dan hre mite leh forest conservation lama tui mite chuan India parliament dan thar hi an khel a ni. Sawitu thenkhat in kan ram chu he dan hian a huam thei lo ani an ti a. Dan tharah hian central sawrkar chuan ram hmasawnna leh ram venhimna atan ramri hnai boruak mela teha kilometre khat chinah chuan a duh ang zawngin hma a la thei ang tih a ni a. Tu state mahin thuneihna a nei thei dawn lo a. Central thu liau liau ani tawh dawn a ni.
A chunga kan sawi Kashmir chungchang leh mizoramin dan bik kan neih chungchang thlir chungin kan ram dinhmun hi ngaihtuah chian a ngai ta hle. Inawpna dan bik nei Kashmir an sawp dan ngaihtuah hian India danpui hnuaia mizoram bik inawpna hi a him em tih thlir ila, parliament in a tul a tih hunah, an hmalakna atana hnawk an tih chuan Art 371 G hi an hlip mai ang em. Art 371 G chu hlip ni ta se chhuanlam chi hrang hrang defence leh development hnuaiah hian an nei ngei ang. He dan hnuaiah vek hian kan inhumhalhna ber inner line regulations te chu palzut a va harsa tawh dawn lo em.
Parliament ah he dan hi pawm ani tawh si a, tih theih kan la nei em? Ram inawpna dan hi mipuite tan a tha tur a ni a. Mipuite tan a tha lo anih chuan mipui hian kan do ngam tur ani ang. Kan tana tha lo turah hian lungrual taka ke kan pen a ngai khawp mai. He ram leh hnam boralna tur dan hi kan do ngam tur a ni a. Ziakin dan chu awm mahse kan chhiatna tur do ngam tur hnam kan ni ve ngei ang. Chu chu kan thlahtute atanga kan zia ani tih i hre mawlh ang u.