Khelmual pawn lamah an team in boruak hrang hrang an ngah; a chhungah erawh an hna an chiang. Spain in an tum ram thlengin an ram chanchin a vawikhatna atan FIFA Women’s World Cup-ah an champion.
Pathianni chawhnuah Stadium Australia-ah England nen final an khel a. 1-0 in an chak.
Spain tan hian left-back Olga Carmona chuan an chakna goal hi a khung a. Semi-final a Sweden laka a lo tih tawh ang bawkin an ram a chakpui.
Final inkhel chu
England hi European champion ni lai an ni a, final mai ni lovin tournament khelh dawnah pawh rinkai an ni.
Lehlamah Spain hi team tha, hmeichhe football a team tha neitute niin Women’s Champions League-ah pawh an teamte an che tha thin.
Nimahsela an coach Jorge Vilda in team a kaihhruai dan leh Spanish FA in hmeichhe team a ngaihthah avangin an player 15 ten nikum khan ram tana khelh an duh loh thu an puang. Kumin World Cup ah heng player 15 zing atangin pathum chiah Vilda hian a ko.
Hei vang hian Spain hi eng ang nge an nih dawn tih hriatthiam an har.
Nimahsela beisei khumin tournament an hmang a, Japan laka group match hnuhnung berah an tlawm hnuah an tang nasa lehzual tih a chiang.
An star player Aitana Bonmatí hovin final-ah an kheltha a, England goalkeeper Mary Earps chuan Lionesses a chhanhim fo.
Manchester United goalkeeper hian second half-ah Jennifer Hermoso penalty pet a save sak bawk.
Sarina Wiegman-i pawlte hian bul tan chhe lovin Lauren Hemp hmangin crossbar tih per nghal mahse Spain in ball an chan hnem zawk avangin na zawka goal nawr an harsat thin.
Spain coach Vilda chuan an chak hnuah, “Kan hlawhtlinna hi thu a sawifiah mai a harsa, ti khawp chuan kan lawm a, he team hi ka chhuang tak zet.”
“Min lo thlirtute zawng zawng pawh ka lawmpui a, anni pawh kan tihlawm ve ngei hi ka beisei. Tunah chuan khawvel champion kan ni.” tiin a sawi a.
A player te fak bawkin, “Heng player-te hi hriat reng an ni tawh dawn. Player tha an nih avangin enkawl harsa lo tak an ni.” a ti.
Spain playmaker Bonmati chu Best Player niin goal nga khung Japan midfielder Hinata Miyazawa chu Top Scorer a ni a. Earps chu Best Goalkeeper a thlan niin Spanish tleirawl Salma Paralluelo chu Best Young Player a thlan a ni.