England midfielder Jude Bellingham-a’n manto taka Real Madrid a zawm hnuah an tana bul a tan that chu a la kal tluang a, Almeria laka goal an chhuah hmasa chungin amah vangin 3-1 in an chak.
Inrinni a Power Horse Stadium a inkhelah hian Bellingham hian goal hnih a khung a, goal khat dang midang khung tur a siamsak.
Los Blancos in minute thumna lekah rin loh takin goal an chhuah a. Almeria counter-attack rang tak mai atangin Sergio Arribas chuan goal a khung a, Lucas Robertone cross a tauh lut.
Mahse Real Madrid in chhanlet nan hun an mamawh tam lo. Na taka goal nawr zuiin minute 18-naah Bellingham-a’n Federico Valverde nen inkawpin tlarhnung an thiah hnuah goal a khung a. Minute 60-naah Toni Kroos ball siamsak atangin Bellingham bawkin goal mawi a khung a. Minute 73-naah Vinicius Junior chuan an goal thumna a khung.
Coach Carlo Ancelotti chuan, “Player puitling tak a ni a, rilru puthmang nghet tha tak a nei. Germany-ah kum thum a awm a, khangte khan tuna La Liga a tha taka khel thei turin a pui nasa hle. A che tha hle a ni.” tiin a player hi a fak a. Bellingham hian goal thum khungin La Liga top scorer a ni nghal mek.