Mizoram Pradesh Mahila Congress Committee President Vanlalawmpuii Chawngthu chuan MNF sorkarin cheng nuai thum sem tura an intiamna tihlawhtling lo va, cheng sing nga chauh an sem te chu Congress sorkarin tang puihna hmangin an chhunzawm sak dawn tih a sawi.
MPYCC in Sorkar Tha leh Kalphung Dik tih thupui hmanga Street Campaign an buatsaih kal zelah, Inrinni zing khan Luangmual Chhangurkawn-ah an neih chhunzawm a. He huna thusawitu Vanlalawmpuii Chawngthu chuan SEDP beisei leh dawn duh vanga MNF-a inziak lut te inthlahrung lo tura chahin, “Cheng nuai thum sem tum te’n cheng sing nga-a tla thla a sem an tum mek hi lo dawng ula, tang tanpuina hmangin kan rawn chhunzawm sak ang che u,” a ti.
Mizoram, hnam leh sakhaw him nan BJP tlansan a, hlat a ngai tawh tak zet tih sawiin Vanlalawmpuii Chawngthu chuan, Manipur-a chi leh chi inkarah BJP in hem an thlak avanga buainaah sakhaw biak in 300 chuang hal chhiat a ni te chu remchangah hmangin Kristian te nek ral an tumna a nih thu a sawi a. Sakhaw zalenna ram India-ah sakhaw tenau te an chep tawh em em a, kohhrana inhmang tak takte hian politics an luhchilh hreh a nih pawhin, an awmna hmun atanga ram, hnam leh sakhaw himna tur an ngaihtuah a tul a. Mipuite pawhin eng party hi nge hnam leh sakhaw tana him tih pawh an chhut thiam a hun tawh niin a sawi.
Vanlalawmpuii chuan hmeichhia te hi ram leh khawtlang hruai tura mipuiin an pawm loh thin tih sawiin, “Hmeichhia kan nih avang hian ram hi kan hmangaih lo a ni lo a. Kan fello bik a ni lo a, ram hi kan hmangaih ve tho a ni,” tiin, Congress party chu hmeichhia te dinhmun sang zawka an din theihna tura aw nei thei awm chhun a nih thu a sawi bawk.
Street Campaign hi MPYCC General Secretary C. Vanlalhruaia’n a kaihruai a ni.