Centre for Environment & Social Justice (CESJ) Mizoram Working Chairman Vanramchhuangi (Ruatfela nu) chuan sorkar laipuiin Forest Conservation & Biological Diversity Amendment Act 2023 a pawm chu Mizoram tana dan tha lo a nih avangin Mizo mipuiin tangruala do a ngaih thu a sawi.
Tuikhuahtlanga CYMA Committee Room-ah Inrinni khan ‘Forest Conservation leh Biological Diversity Amendment Act 2023 hnuaiah Article 371G hian min hum thei em?’ tih zirhona neih a ni.
He hunah Vanramchhuangi chuan he thupui hmanga zirhona buatsaih a nih chhan chu mipuiin environment dimdawi nachang an hriat loh vang leh sorkarin environment humhim hi development a hmakhalhtir avangin environment-in a tawrh thu a sawi.
Vanramchhuangi chuan tun hnaia hmasawnna ruhrel lian hrang hrang, a bikin NHIDCL kawng laiin dan zawng zawng bawhchhiaa environment an tihchhiat dodal mek a nih laia central-a BJP sorkarin Forest Conservation & Biological Diversity Amendment Act 2023 a pawm a nih thu sawiin, “He dan siam that hi Mizoram tana dan tha lo tak, ram neitu kan nihna min chhuhsak theihna leh kan environment tichhe vek thei a nih avangin Mizo mipuiten tangruala kan do a ngai tak zet a ni,” a ti.
He hunah hian Lalthlamuana Pachuau, CCF (Rtd) chuan FC&BD Amendment Act, 2023 a sawi fiah a. Dr. Joseph Lalfakzuala, Jawaharlal Nehru University (JNU), New Delhi atanga Article 371G-a Ph.D zo chuan Article 371G a sawi fiah bawk.
He mi hnu hian academician, lawyer leh political party hrang hrang aiawhten FC&BD Amendment Act, 2023 dan thar chu Mizoram a nghawng dan turte sawihona neih zui a ni a. Thusawitu tam zawkin he dan thar hi Mizoramin lo do let tura tanrual a pawimawhzia te, political party nihna dah thaa kohhran leh civil society nen an zavaia tan ho tulzia bakah environment humhim tura hmasawnna awmzia dik tak ngaihtuah ngun a tul thu an sawi.
He hun hi K. Vanlavena, MP (RS) pawhin hmanpuiin, “Mizoram hian kan ramngaw aia rohlu dang kan nei lo a. Khawvel ram dangte neih ve loh ramngaw kan nei a, venhima humhalh chu keimahni mawh a ni a. Hnam anga kan tanrual a tul takzet a ni,” a ti.
C. Lalramzauva, Sr Advocate, Legal Adviser to CM pawhin Mizoram sorkar ngaihdante leh tuna dan thar leh Article 371G in kungkaihna zau takin a sawi a. Naktuka neih tan tur, ni hnih awh Mizoram Assembly thutkhawm neih turah Mizoram sorkarin he dan thar hi Article 371G tlawh chhanin resolution siam an tum thu a sawi bawk.
CESJ Adviser, Dr. Laldinpuia kaihhruai zirhona buatsaihah hian kalkhawmten resolution pahnih an pass nghal bawk.
Resolution:
- Adviser to Chief Minister chuan Assembly-ah The Forest (Conservation) Amendment Act 2023 Leh Biological diversity (Amendment) Act 2023 hi Mizoramah kan hman ve loh nan Mizoram State Legislative Assembly-ah pawm loh tur thu put luh an tum thu a sawi hi lawmawm kan ti hle.
- The Forest (Conservation) Amendment Act 2023 leh Biological Diversity (Amendment) Act 2023 chungchangah Mizoram humhim anih theih nan, a tul ang zela kohhran, civil society, leh sawrkar tangho a hmalak ni rawh se.