Taliban chuan Afghanistan-a Indian consulate pahnih vel luhchhuahin lehkha pawimawhte an zawng a, car inhungte pawh an khalh chhuak daih niin Zirtawpni khan sorkar chuan a sawi.
An pawl hruaituten khawvel hmuhah dan pela chet tum lo anga lan an tum mek laiin hetianga chetna hian Taliban rorelna dinhmun a tar lang nia ngaih a ni.
Taliban mite hian Kandahar leh Herat khawpuia Indian consulate khar tawh chu an luhchilh a. Kandahar-ah hian lehkha pawimawh awmte an hai a, consulate pahniha lirthei inhungte an la chhuak bawk.
India thuneitu sang pakhat chuan, “Hetiang hi kan rin dan sa a ni a. Lehkha pawimawh an zawng a, embassy pahniha lirthei an la daih bawk,” tiin NDTV a hrilh.
Hetiang thil a thlen hma lawk hian Taliban hian Delhi bepawpin India chuan Kabul embassy-a a palaite la chhuak lo turin an ti a. Sorkar hian Taliban-te Qatar pisa atangin message hi an dawng a, Indian staff leh vengtute chu an him dawn tih an hrilh niin an sawi.
Message hi Taliban political unit chief, Abbas Stanikzai-a hnen atangin thawn niin an hria.
Tun kar tir lamah khan India hian embassy staff-te hi Indian Air Force C-17 thlawhna pahnih hmangin Kabul atangin a hruai haw tawh a. Taliban-ten Afghanistan an thunun leh tak avangin civil mi tam tak pawhin chhuahsan an duh a, Indian pawh 1,000 chuang an la tang nia hriat a ni.