ZPM Political session zirtawpnia neihah an party PAC member TBC Lalvenchhunga chuan ZPM policy in a tum ber chu khawtlang, ram leh hnam bakah sakhua humhim a nih thu a sawi.
ZPM party pisa-a chhung inkhawmah TBC Lalvenchhunga chuan, tun laiin Mizo thalaite ruihhloin a tibuai nasat chhan ber nia lang chu, ram kalphung a dik tawk loh vang niin a sawi a. “Eirute leh smuggler-te zalen taka khawsain in leh lo changkan tak tak nen khawtlangah zah an kai a; pitar putar kum 70-80 chuang tawh ten an fate enkawl lovin an tute an enkawl tam tak an awm a ni,” a ti.
Thalai zingah hmeichhia aiin mipa an thi nasa em em te hi tih takzeta vei a hun tih sawiin TBC Lalvenchhunga chuan, “Eng ang pawhin hmasawnin, in leh lo tha tak tak nei mah ila, he ram enkawla rochun tur ber thalai kan neih loh chuan hnam boral kan ni dawn tho a ni,” tiin, ZPM pawhin policy tha tak tak an neihte tihlawhtlingtu tur chu thalaite an nih thu a sawi.
“Kan ram hi a dam lo va, kan thalaite intihhhlimna leh hawikhawthawnna turte kan ngaihtuah a ngai a, an rilru tih hriselna turin kan huang pawh kan tih zauh a ngai a ni,” tiin TBC Lalvenchhunga chuan ZPM policy-in a tum ber chu khawtlang, ram leh hnam, sakhua humhim a nih thu a sawi.
TBC Lalvenchhunga chuan Pathian leh mipui zara ZPM an sorkar chuan Mizorama industry-a hmasawnna turin kawng hrang hrangin hma an la dawn tih a sawiin, “Tuna Industrial Policy hman mek hi a tul anga siam that a ni ang,” a ti a. Industry tihhmasawn nan industry dintuten Hand Holding Policy hnuaiah hamthatna (subsidy) Rs. Vbc 1.5 thleng an dawn theihna tur budget-ah sum dah a ni dawn a, Central Fund/Scheme an haichhuah theih nan state matching share pawh private entrepreneur-te hman theih tura ruahman a ni tur thu a sawi bawk.