Aizawl: ZPM Leader Lalduhoma chuan ZPM chu tualto party a nih angin vai pawl an zawm ve dawn loh thu a sawi.
Inrinnia ZPM Aizawl West I huam chhunga Block II mi thar lawm luh inkhawm, Sairang YMA Hall-a neih hmanpuitu Lalduhoma chuan, ZPM chu tualto party an nih avangin tuma bawihah an lut dawn lo va, vai pawl an zawm ve dawn loh thu sawiin, “Kan ram leh hnam, kan sakhua tan kan ding zel dawn a ni. Kan hnam hi a insingsa mek a, ZPM hian kan political goal chu Zofate zawng zawng rorelna pakhat hnuaia awm a la ni reng a, hei hi engtikah mah kan thlauh thla dawn lo a ni,” a ti.
Tun lai hian party pahnihin ZPM an do rawn mek hian dinhmun tha takah an ding tih a tilang chiang tih sawiin Lalduhoma chuan, “Tunah hian party dang hian min bei nasa vuai mai a, kan kal sual an hlau hle a, min veng char char tihna a ni. Kan kal sual hlek nia an hriat chuan nasa takin min sawisel thin a, hei hi a lawmawm kan ti hle a, sorkar tharah pawh opposition tha tak an nih kan ring,” tia sawiin, party dangin an thil lo tih tawh angte ZPM in an ti ve a nih chuan rang takin an sawisel nghal dawn a, chu chuan hmalakna zelah pawh nasa takin a pui an beisei thu a sawi.
Block President Vanchunglura kaihhruai inkhawmah hian Aizawl West I ZPM candidate TBC Lalvenchhunga, Aizawl West II ZPM candidate Lalnghinglova Hmar leh Aizawl South III ZPM candidate Baryl Vanneihsangi te pawhin thu an sawi a. ZPM Leader Lalduhoma’n ZPM-ah mi eng emaw zat a lawm lut nghal bawk.