Aizawl : Lallunghnema lehkhabu ziah, ‘Kimna Kailawn’ chu nimin khan Aizawl Press Club President Room-ah MJA president C. Lalrambuatsaiha’n a tlangzarh.
Lehkhabu tlangzarhtu MJA President chuan hlawkna um lova mite tana thawktu Lunghnema taimakna fakawm a tih thu a sawi a. Thuziak mite chu khawvelah an kuthnu a awm reng tawh dawn avangin an thih hnuah pawh thangtharten an hming an lamri reng tawh dawn a ni tiin, he lehkhabu chhiar apiang ten an hlawkpui ngei a beisei thu a sawi.
Kimna Kailawn lehkhabu ziaktu Lunghnema pawhin a lehkhabu ziah tlangzarh a ni ta chu lawmawm a tih thu a sawi a. An chenna inah pawisa la lova consumer te tana hma an lak thu a sawi a. Tunah hian lehkhabu dang, ‘Consumer te zalenna’ tih a buatsaih leh mek thu a sawi bawk.
‘Kimna Kailawn’ lehkhabu hi phek 150 a chhah, Rs. 150 man a ni a. Synod Bookroom leh Baptist Bookroom-ah te lei theih a ni ang.