La Liga champion Barcelona in an inkhel hmasa bera point an hloh nghal hnuah a vawikhatna atan league-ah hnehna an chang a. 2-0 in Cadiz an hneh.
Pathianni zanah Barcelona hi an khelmual Camp Nou chu chet that hna kalpui mek a nih avangin Estadi Olímpic Lluís Companys-ah an inkhel a. Pedri leh Ferran Torres ten goal khungin hnehna an chang.
Mikhual team Cadiz tan hian goalkeeper Conan Ledesma a che tha hle a. Save tha tak vawi engemaw zat siamin a team mualpho tur hliahkhuhtu a ni.
Ledesma hian kum 16 mi Lamine Yamal goal khung tur tha zetin vawi hnih a dansak a. Yamal hi hrem tawh Raphinha aia khel niin a vawikhatna atan Barcelona tan bul a tan.
La Liga a kum zabi 21-na aSub inkhel bul tan thei naupang ber niin kum 2012 September a Fabrice Olinga in Malaga tana record a siam chu a khum a ni.
Cadiz goalkeeper Ledesma hian hmun leh hmunah Jules Kounde goal khung tur a dang bawk a, Robert Lewandowski lakah pawh save tha tak a nei bawk.
Cadiz hian anni aia team tha zawk Barca lakah counter-attack an chhawr viau a, amaherawhchu a hmawrbawk lamah an buai thin. Roger Marti-a’n chance tha vawi hnih a nei.
Barca goal te hi huntawp dawna khung niin minute 83-naah lkay Gundogan pass tha atangin Pedri-a’n goal a khung a, huntawp hma in substitute Torres-a’n goal a khung ve leh bawk.
Inkhel zawhah Barcelona coach Xavi chuan, “Goal kan khung tlai hle a, kha aia hma khan khung tur kan ni. Mahse season tan tir a ni a, goal hmaah kan la hriam tawk lo. Kan inkhelah khan Gundogan-a pass ang kha kan mamawh a, kan lakluh chhan pakhat a ni.” tiin a sawi.
Inkhel dangah Atletico Madrid in Real Betis hmachhawnin goal an khung thei lova, 0-0 in an inhnehtawk.
Estadio Benito Villamarín a khawlum tak hnuaia inkhelah hian Real Betis in first half an thunun hneh viau a. Second half-ah Atletico hian na zawkin nawr mahse Betis tlarhnung nghet tak an su tlang thei lo.
Atletico manager Diego Simeone chuan, “First half-ah kan tha tawk lo. Betis in ball an thunun tha zawk. Second half-ah a inthlak thawk a, kan kheltha viau in ka hria a, goal erawh kan khung a ngai.” tiin a sawi.