MPCC Vigilance Cell chuan nimin khan Aizawl Press Club-ah thu thar thehdarhtute an kawm a, Meidum leh Hortoki inkar kawng laihnaah Mizoram sorkarin tul loah mipui pawisa Rs. nuai 17,811 a hmang niin an sawi a. Hemi chungchang chhui zui turin nimin vek khan Lokayukta-ah FIR an theh lut bawk.

MPCC Vigilance Cell Chairman Lalrindika Ralte, MLA chuan Meidum leh Hortoki inkar kawng laih a thawh khatnaah Rs nuai 4,445 sanction a ni a. A thawh hnihnaah (Phase II) ah Rs nuai 13,366 sanction a nih thu a sawi a. Heng sum hi NABARD atanga pawisa puk chawpa thawh a nih thu a sawi.

Lalrindika Ralte chuan sorkarin he project a kalpui chhan nia a sawi, Hortoki khaw chhehvelah ONGC-ten lei hnuai zirchianna an nei a. Chumi atan chuan khawl leh motor lian tak tak lak luh a ngaih avangin he kawng laih hna hi thawh a nih thu a sawi.

Sorkarin khawl leh motor lian lak luh a ngaih avanga kawng laih hna thawh nia a sawi laiin, ONGC hian Meidum-Hortoki vela oil/gas zawn hna an thawh chu October 7, 2015 khan an lo chhuahsan daih tawh a, an bungrua pawh ONGC Forward base, Srikona, Silchar-ah an dah vek tawh thung tih a sawi bawk.

Directorate of Geology & Mining, Annual Report 2022-23 Chapter D-(2)-a a lan danin, ONGC hian Mizoram sorkarah Petroleum Exploration License Fee a pe tawh lo tih a sawiin Lalrindika Ralte chuan, “Hei hian Mizorama oil/gas zawn hna chu an tawpsan tih a tichiang a. Oil/gas zawn hna chhunzawm leh tur chuan Directorate General of Hydrocarbons (DGH), Noida atanga phalna an neih a ngai a. Vawiin thlengin phalna an la nei lo a, phalna hi an hmu dawn em tih pawh a sawi theih loh,” a ti.

MPCC Vigilance Cell chairman chuan ram sum leh pai dinhmun a chhiat em em lai leh sorkar hnathawkte pawhin hlawh an lak mumal theih loh lai leh, mi rethei damlo inenkawlna bill takngial pawh sorkarin a batsak laia mahni hmasial nan leh mi mal induhsak nana mipui pawisa heti zat hman ral a ni hi pawi an tih thu a sawi a. Ram mamawh pawh ni lo, mi mal induhsak nana mipui pawisa Rs nuai 17,811 lai a luang ral chu pawi an tih thu a sawi a. He thila a mawhphurtu hi man chhuah an nih a, dan hmanga hrem an nih ngei theih nan a tawp thlengin hma a la dawn niin a sawi bawk.

MPCC Vigilance Department in Meidum-Hortoki inkar kawng laih hna thawktu Contractor an sawi te:

A thawh khatna (Phase I)
RV Hluna, Eden Thar, Aizawl

A thawh hnihna (Phase II)
i) Package I : Zoramchhana, Electric Veng, Aizawl
ii) Package II: Lalthanthuami, Chawnpui, Aizawl
iii) Package III: KR Construction, Thuampui, Aizawl
iv) Package IV: V. Lalbiakzama, Venghlui, Aizawl
v) Design & Construction of T Beams : KR Construction, Thuampui, Aizawl
vi) Design & Construction of T Beams : Zoramchhana, Electric Veng, Aizawl

(Package 1-IV te hi June 25, 2023-a zawh tura ruahman, package V leh VI te hi June 24, 2023-a zawh tura tih a ni)