Aizawl : BJP Mizoram President Vanlalhmuaka’n MNF sorkarin kum nga chhung Delhi khawpuiah Mizo mipuite an vahvaih pui niin a sawi.
Nimina BJP State office ‘Mipui Run’ a chawlhkar thar inhlanna leh political session an neihah thu sawiin Vanlalhmuaka chuan, “MNF sorkarin kum nga chhung Delhi-ah min vahvaih pui a. Cheng nuai thum min risk pui a, kan hlawhchham thak a, CM leh a kaihhruai te vawi tam tak Delhi-ah kalin kut ruakin an lo haw leh thin a, kan Minister rual te leh MP te vawi tam tak Airport-ah hmuak thin mah ila, thil tha hawn sawi tur an nei lo thung,” tiin, Mizoram mamawh tak tak haichhuak a, ram chhunga seng lut tur chuan ramin BJP sorkar a mamawh avangin inthlanpui lo awm turah BJP Mizoram thlang tling turin mipui a ngen.
Vanlalhmuaka chuan Mizorama sorkarna lo chelh tawh Lal Thanhawla’n central-a sorkar apiang hi state-ah sorkar tir a ngai tia a sawi chu thudik a ni, tiin, “Pu Hawla thusawi hi thenawm state-te chuan an lo awihin, an lo rin bawk avangin vawiinah chuan hmar chhak state-ah Congress party-te chuan BJP an zawm ta dual dual a, chumi avang chuan sorkar laipui malsawmna an dawng a, hmasawnna nasa takin a thleng ta chur chur mai a ni,” a ti bawk.