West Ham United in London derby-ah sum hmang hnem tak Chelsea chu an hneh a, minute 30 vel tlem zawk ni chungin khel mahse Blues in Hammers an tluk meuh lo.
London Stadium-ah hian Hammers in 2-1 a hma an hruai laiin an goal hmahruai khungtu defender Nayef Aguerd chu yellow card a hmuh nawn avangin hnawhchhuah a ni.
Blues hian an tam zawkna hi chhawr tangkai an tum viau a, mahse awmzia a awm thui lo. Anmahni zawkin huntawp dawnah goal chhuahin penalty an chawi a, Lucas Paqueta chuan Hammers chakna nemnghet turin goal a khung.
Minute 7-na lekah Aguerd-a’n Hammers goal hma hruai a tauh lut. Mahse hei hi Blues in an sut har lo, first half-ah rawlthar Carney Chukwuemeka chuan club tana a goal hmasa ber a khung.
Chelsea in hmahruai theihna remchang an nei a, midfielder manto Enzo Fernandez chuan penalty khung lovin Alphonse Areola chuan a save sak.
Second half-ah Michail Antonio chuan West Ham goal hnihna minute 53-naah a khung bawk.
Blues in British football a manto ber Moises Caicedo chu second half-ah luhtirin Ecuador midfielder hi thla hnih a inkhelh tawh loh avangin match fitness a nei lo tih a chiang. Thutlukna siam sual a neih zeuh zeuh hnuah huntawp dawnah penalty a chawi.
West Ham manager David Moyes chuan, “Kan result a lungawithlak viau mai. Team tha an ni a, mahse kan player-te an kheltha tak zet. Kar hmasa pawh khan an kheltha tawh.”
“Tun tumah chak turin kan han beih deuh hlek a ngai a, player 10 kan nih pawhin kan hnual miah lova, goal kan khung belh zawk a ni.” a ti.
Chelsea boss Mauricio Pochettino chuan, “West Ham inkhelh thiamdan kan hrechiang a, mahni inven a, nawr let thut hi an thiam. Keini lamah chuan goal kan khung a pawimawh a, chance kan insiam hnem a ngai.” tiin a sawi.
Inkhel dangah season tha hmang tura beisei Aston Villa in 4-0 in Everton an hneh a. John McGinn, Douglas Luiz, Leon Bailey leh Jhon Duran ten goal an khung.