Juventus in Italy a Serie A season thar inkhel an hmachhawn hmasak berah Udinese 3-0 in an hneh a, first half-ah goal thum khungin point thum an hmu awlsam.
Udinese Arena-ah Massimiliano Allegri pawlte hian a vawi 37-na atana league champion nih tumin bul an tan tha viau a. Federico Chiesa, Dusan Vlahovic leh Adrien Rabiot ten goal an khung.
Second half-ah Juventus in ball an chang hnem a, chance siam tam lo mahse Udinese in an tibuai tam lo. Vlajovic-a’n goal khung belh mahse offside avanga pawm loh a ni.
Inkhel dangah kum 36 mi Antonio Candreva chuan a team Salernitana in an mamawh hunah tak goal hnih khungin AS Roma nen 2-2 in an inhnehtawk.
Stadio Olimpico-ah AS Roma tan season hmasa a league goal khung miah lo Andrea Belotti chuan goal hmahruai a khung hnuah Candreva hian halftime hma leh hnuah goal khungin huntawp hma in Belotti bawkin Roma si phurh a sut.