Aizawl: UNO-in khawvel huapa ni hman bik a neih pawimawh tak World Entrepreneurs’ Day 2023 chu vawiin khan entrepeeneur thahnemngai zual kalkhawmten Woodland Hills-ah hlawhtling takin an hmang.
Hun hmanpuitu, Angela Zothanpuii, Director – Labour, Employment, Skill Development & Entrepreneurship (LESDE) chuan, “Mizoramah LESDE a lo din hnuah kan phak ang tawkin hma kan la a. Entrepreneurship chawikan leh chawisan hi hna hmanhmawh a ni,” tiin, “Hma lakna tur tam tak a awm a, a theih ang anga thurawn min pe turin ka ngen che u a ni,” a ti.
Mizoram Rural Bank chairman Sheryl Vanchhawng pawhin thu sawiin, Mizorama World Entrepreneurs’ Day hman a ni ve chu lawmawm a tih thu a sawi a. MRB chu entrepreneurship chawikan nana pawimawh funding lamah theihtawk an chhuah mek thu a sawi.
Kalkhawm huaihawttu Joseph L. Ralte chuan, kum 2010 atangin UN level-ah khawvel pum huapin August 21 hi World Entrepreneurs’ Day anga hman tan niin, hemi ni hian entrepreneur-te intihhlimna leh sharing hun atan te an hmang a. Entrepreneur thate chawimawina hun atan an hman thin a nih thu leh, kum lo awm leh zel turah hun hlimawm tak hman chhoh zel ni thei se thaa a hriat thu a sawi.
World Entrepreneurs’ Day-ah hian Dr. Vanlalsiama Chhangte (Ebenezer Medical Centre) chuan Entrepreneurship lama Leadership pawimawhzia a sawi a. Danny Hmar MBA (IIM-A) chuan Marketing chungchang a sawi bawk.
He hunah hian entrepreneurs eng emaw zat an kalkhawm a ni.