Aizawl: Mizoram sorkar hnathawkten sorkar thuchhuah ding lai anga Dearness Allowance (DA) rate pek phutin August 28-30, 2023 chhung pen down strike an nei dawn.
Federation of Mizoram Government Employee & Workers ruahmannain sorkar hnathawkte hian an thil phut tihhlawhthlin ngiatin August 17 leh 18 khan an hnathawhna hmunah badge dum an bel a, lungawi lohna an lantir hian awmzia a nei lo a, chief minister nen indawr bawk mah se an inrem thei lo.
Nimin khan FMGE&W general council chu an kal zel dan tur ngaihtuahin an thukhawm a, na zawka sorkar kar an rel a. An thil phutte sorkarin a tihhlawhtlin loh avanga lungawi lohna lantir nan leh sorkar kar nan August 28 atanga 30 thleng pen down/tool down strike (hnathawk loa pisa kai) an rel a, hei hian awmzia a nei lo a nih chuan August 31 leh September 1-ah mass casual leave lak chhunzawm an tum a, hei hian awmzia a la nei lo cheu a nih chuan September 4-ah an kal zel dan tur an rel leh ang.
Lungawi lohna an lantir chungchanga August 21, 2023-a FMGE&W leh Chief Minister Zoramthanga an indawr tum khan CM chuan tun dinhmunah sorkar sum dinhmun a that loh avangin FMGEW hruaitute chu lo hrethiam hram tur leh lungawi lohna an lantir mek chu titawp turin a ngen.
Nimina an thutkhawmah hian hian CM nena an indawrna hi FMGE&W hruaitute chuan report pein an sawi ho a, CM ngenna hi an pawm lo a, sorkar kar nan na zawka kal an rel ta zawk a ni.