New South Wales (NSW), Australia-a ruah nasa tak sur avanga tui lian mekah mi 18,000 vel hmun himah sawn chhuah an ni tawh a, ruah hi a sur chhunzawm rin a la ni.
He state-a vaukam hrul zawng zawng chu ruah nasa tak sur leh tui lian thei dinhmunah a ding vek.
Ruah a sur teuh hnuah tuikhuah leh luite lianin an state khawpui, Sydney leh a chhehvel leh Queensland chhimchhak lam chu tui lianin a tuam mek.
Chhanchhuah leh chhawmdawl hna thawk turin sipaite pawh tirh luh an ni a, heti taka ruah tam leh tui lian hi ‘kum 50 dana vawi khat thleng’ angin an sawi.
An rama khaw chin zirtu, Bureau of Meteorology chuan NSW-ah hian vawiin hian ‘ruah tam zawk, thli kak tak, tui fawn nasa leh tui chim chin sang’ a la thleng dawn niin an sawi lawk.
State an neih zingah Western Australia tih loh, state tinah ruah sur tur avanga inralrinna khawn rik niin mi maktaduai 10 vel an inring.
NSW Premier Gladys Berejiklian chuan nimin tlai thleng khan thi an awm an la hriat loh thu a sawi a, ‘thil mak tak a ni’ tiin a sawi hial.
Thihna em thleng lo mah se Australia mipui hmun thuma thena hmun khat zet, mi maktaduai 25 vel chenna state-ah hian chhiatna erawh a thlen nasa hle.
Berejiklian-i chuan nikum nipuia ram kang leh khawkheng tuartu veng leh khaw tam tak tuiin a chim tih a sawi.
“Hripui kan tawrh mek laia hetianga kan state-a a zawn zata khuarel chhiatna lian a thlen lohna chin hi ka hre thei lo,” a ti.
Prime Minister Scott Morrison pawhin hmun hima mihring thiar chhuah nan tanpuina pek a tiam a. Parliament rorel inkhawmah NSW-in a thil tawn mek chu ‘thil hlauhawm tak’ a nih thu a sawi.