Aizawl: West Tuipui bialtu MLA Nihar Kanti Chakma chuan Lunglei leh Tlabung inkar kawng chhe lutuk avanga a bial chhung tawrhna assembly house-ah a sawi chhuak a, kawngpui tha an neih thuai theih nana hma laksak turin sorkar a ngen.
Nimina assembly session neihah West Tuipui bialtu MLA chuan calling attention motion hun hmangin Lunglei leh Tlabung inkar kawng, an nunna hnar kawngpui ber chu a chhiat thu sawiin, public transport, sumo leh lirthei dangte pawh an tlan duh tawh lo a, mipui zin veivak leh mipui mamawh la thinte tan pawh harsatna namen lo a thleng mek tih a sawi.
Nihar-a chuan kawng chhiat avangin mipui mamawhte a chawk luh theih loh a, Tlabung khuaa kudam leh dawrah pawh buhfai lei tur a awm tawh lo tih a sawi a, tun hnai maiah pawh Tlabung khuaa damlo pahnih chu kawng lakah an boral tih sawi bawkin, “Kawng chhiat vang tia puh vek theih chu a ni kher lo mai thei; mahse, kawng tha pangngai, tluang taka tlan theih chu nise, an nunna chhan hman a nih ngei ka ring tlat,” a ti.
West Tuipui bialtu MLA chuan National Highway 302, Lunglei leh Tlabung inkar kawngpui hian ngaihsak a hlawh lo a, kum tin a chhe em em ringawt tih sawiin, “Chhim lam mipuite nunna hnar, kan ei leh in tur leh châk lakna ber kawngpui heti tak maia a chhia hian mipuite rilru pawh a tina hle a, bialtu ka nih ang pawhin hrehawm ka ti hle,” a ti a, kawngpui tha an neih thuai theih nana chak taka hma laksak turin sorkar a ngen thu a sawi.
West Tuipui bialtu MLA-in kawng chhe chungchang asawi hnu hian speaker sawmna angin PWD changtu, Chief Minister Zoramthanga chuan National Highway 302 kawng chhe chungchang chu sawifiahin, helai kawngpui hi double lane tura sial mek a nih thu te, furpui nen a innan avangin kawng chu nasa takin a chhiat phah ta tih a sawi a; MLA-in a sawi mipui tawrhna pawh sorkarin a hriatpui thu a sawi.