Assam leh Mizoram ramri a ralmuan chhunzawm theih nan thawhho dan tur relin nimin khan Cachar leh Kolasib district thuneitute an thukhawm.
Dholai Police Station Conference Hall-a thutkhawmah hian Kolasib DC John LT Sanga chuan thutkhawm hmasaa rel tawh bawhzuina hrang hrangte a sawi a. Kolasib leh Cachar district chu ramri thui tak intawm an nih angin a tul apianga inpuitawn tur leh boruak muanawm siam tur a thawh hona tha a awm a pawimawh thu a sawi.
Thutkhawmnaah hian ramri-ah zin miten harsatna an tawh loh nan ramri a sipai leh police duty-te chu a tul anga tihtlem hret hret a pawimawh thu te, ramri kâna ruihhlo leh dan lova ramsa tawlh awm thin veng tur a thawhho dan tur te, ramria state pahnih forest department mi leh saten hmalak an tum apiangin harsatna a thlen loh nan inhrilhhriat hmasak thin a pawimawh thu te sawi a ni.
Mizoramah MLA inthlanpui nei tur a inbuatsaihna kal mekah Cachar district thuneitute chuan a tul apiang a puih an inpeih reng thu an sawi a. Tun hnaiah Assam registration number nei Alto motor thahnem tak Kolasib paltlanga Mizoram lo lut an awm thin chu uluk zawk a thlithlai a pawimawh thu sawi a ni bawk.
Thutkhawmah hian Cachar district atangin Rohan Kumar Jha, IAS, Deputy Commissioner, Cachar district; Numal Mahatta, SP, Cachar, DFO, Addl. SP Cachar-te an tel a. Kolasib District aiawhin John LT Sanga, Deputy Commissioner, Kolasib; Lalrinawma Traite, SP; Margaret Lalramchhani, DFO; Cheemala Shiva Gopal Reddy, SDO (C); Lalremruata Sailo, SDO (C), Vairengte leh Hmingthanzuala, DIPRO, Kolasib te an tel a ni.