Arsenal in Premier League-ah match hnih atanga chak ve ve thei pathum zinga mi ni turin hnehna an chang a. Crystal Palace lakah 1-0 a chakin an mamawh result an sual chhuak.

Selhurst Park-ah Gunners in an duhdan anga khelh mai an harsat a, second half-ah red card avangin an kim lo bawk. Mahse heti chung hian an goal khat neihchhun chu hnehna chan nan an humhim.

Gunners an tlo

Arsenal hian nipui laia an lakluh Jurrien Timber inhliam avangin an chan nghal a, hei vang hian tlarhnungah an inpawtchawp viau. Dinglam sir a khel thin Takehiro Tomiyasu chu left-back ah dahin midfielder Thomas Partey chu right-back ah khelhtir a ni a. Tunlai manager ten an hman fo ‘box midfield’ siam tura a lai a tlan lut thin tura dah a ni

Nidang pha chiah lo mahse Gunners an khelchhe lova, inkhel a ball chang hnem zawk an ni. Goal erawh an khung mai lo.

Second half tan tirah Eddie Nketiah chu Palace goalkeeper Sam Johnstone chuan a ti tlu a, penalty chawiin captain Martin Odegaard chuan goal-ah a khung.

Goal an neih hnuah Arsenal hahdam chhung a rei lo, minute 67-naah Tomiyasu chu yellow card a hmuh nawn avangin hnawhchhuah a ni.

Tam zawk an nihin Palace in goal an nawr na a, Gunners box-ah ball an lalut ngun. Mahse Arteta pawlte an tang khawng tlat.

Tyrick Mitchell leh Odsonne Edouard ten huntawp dawnah goal an khung teuh ve ve a, mahse si phurh sutna goal an nei thei lo.

Arsenal boss Mikel Arteta chuan, “Result tha a ni. Ka lawm tak zet. Mikhual team ni chunga minute 30 chuang player 10 a khelh hi thil hautak tak a ni. Mahse kan substitute te an che tha vek. An tih tur tha takin an ti vek a ni.” tiin a naute a fak.

Palace manager Roy Hodgson chuan, “Player 10 an nihin theihtawp kan chhuah a, mahse team tha an ni a, kan tlin tawk min dansak thei. Kan inpekna ngaihtuah chuan point khat chu kan phu in ka hria.” a ti.