Mizoram state Legislative Assembly chuan tun hnaia parliament in hnihin a pawm tak, Forest Conservation (Amendment) Act, 2023 chu tha a ti lo a, a dodalna official resolution a pawm.
Mizoram Legislative Assembly pariatna thutkhawm vawi 12-na, ni hnih awh tur chu nimin khan tan a ni a, zawhna leh chhanna hunte hman zawh a nih hnuah Forest Minister TJ Lalnuntluanga’n Forest Conservation (Amendment) Act, 2023 dodalna resolution chu a pu lut.
Forest minister chuan dan hlui ni ta, Forest (Conservation) Act, 1980 siam danglam tuma rawtna awm, consultation paper chu state tinte comment turin October 2, 2021-ah central atangin lehkha an dawng a, uluk taka an zirho hnuah an pawm loh thu chu October 21, 2021-ah ziakin an thlen a, hemi hnuah pawh an pawm loh thu thlen nawn lehin June 1, 2023 khan an duh lohna chu Lok Sabha secretariat-ah PCCF hminga an thlen leh thu a sawi.
He dan pawm tak hi bill a nih laiin a dodalna thu thlen mah se central lamah a tam zawk an nih avangin an duhthusam chu a thleng thei ta lo tih sawiin, Mizorama ram humhalhna tur leh thing leh mau chereu mai tur humhalhna tur atana lehkha leh thil dang tam taka hma an laknain awmzia a neih tak loh avangin Mizorama rorelna sang ber, house-ah a dodalna a pu lut ta tih a sawi.
Forest Conservation (Amendment) Act, 2023 dodalna resolution hi member-ten an sawi ho a, House Leader Zoramthanga chuan he dan Mizoramin a duh lohna chu aw ring taka chhuah a tul thute a sawi a, ani bak member parukin resolution hi an pawm thu leh he dan hi ram tan a that loh avangin dodal a tul thu an sawi a; an zinga mi, BJP MLA Dr BD Chakma chuan resolution a pawm loh thu a sawi thung.
Sawihona neih anih hnuah Assembly Speaker Lalrinliana Sailo chuan vote lain pass rem ti an tam zawk a, Forest Conservation (Amendment) Act, 2023 dodalna chu Mizoram state Legislative Assembly-ah pawm a ni ta a ni.