August, 2021-a thuneihna an chan leh rualin an ngaihdam vek tur thu sawi mah se Taliban chuan Afghan sipai leh sorkara thuneitu ni thin mi 200 chuang thah an ni tawh niin Afghanistan-a United Nations mission chuan a sawi.
United Nations Assistance Mission in Afghanistan (UNAMA) chuan kum hnih liam taa Taliban-in thuneihna an chan leh hnuah a vawi khat nan report a tichhuak a, mihring dikna chanvo palzutna liantham 800 chuang a awm a, heng zingah hian mi man ngawt te, mi hren te, mi sawisak te, duhdah taka inenkawl te leh awm lo tura intihna te pawh a tel.
UNAMA-in a chhinchhiah dan chuan sorkar mi pawimawh ni thin leh venhim hna thawktu ni thin thah zinga a zahve dawn hi Taliban-in rorelna fawng an chelh atanga thla li chhunga thleng a ni a. Kum 2022 thlengin hetiang hi thleng zuiin mi 70 vel thah zui an ni leh niin an sawi.
“UNAMA-in report a siam hian Taliban-in rorelna an chan leh hnuah sorkar nihna lo chelh tawh leh venhim hna lo thawk thinte laka an chet dan chu a lang chiang hle a ni,” tiin UN High Commissioner for Human Rights, Volker Turk chuan Thawhlehnia report tlangzarhnaah hian a sawi a ni.
“Tumah an bitum zui loh tur thu an sawi chungin hetiang hian an che a, mipuiin anmahni an rinna an phatsan chiang hle a ni,” a ti a. Taliban chuan khawvelin dan a zamte zawma nakin zelah bawhchhe lo turin a ngen nghal bawk.
August, 2021-a President Ashraf Ghani-a’n an ram a tlanchhiatsan hnuah khan Taliban hian Afghanistan puma sorkar hnathawkte ‘ngaihdam vekna’ a puang a, hmeichhiate chu an sorkar zawm ve turin an sawm bawk.
Intiam mah se UN report-a a lan dan chuan sorkar hmasa hnuaia thawk leh Afghan National Defense & Security Forces (ANDSF) mi 424 man leh hren an nei a. Mi 144 chu nasa taka sawisak leh tha lo takin an enkawl bawk.
UN agency-in mi mal a kawm thenkhat chuan sawisakte hi pipe leh hruizena vuak te, tawngkama vau leh chhaih nawmnah te pawh a tel a tel tih an sawi.
UNAMA hian chhungkaw thenkhat chuan an mi zinga mi man emaw, chin hriat loh an awm fo va, heng mite hi a hnu lawkah an ruang chhar leh thin an nih thu an sawi niin a tar lang a. Mi thenkhat phei chuan hmuh zui tur awm miah lo pawh an awm thin.
Report hian Taliban-in thuneihna an chan atanga June 30, 2023 thleng a huam a, Afghanistan-ah hian ‘hleilenna a leng’ niin an sawi.
Thubuai thenkhat chu chhui a ni ve thin ngei a; mahse, kalpui zui dan chu a langtlang lo hle thin a, rintlak loh tak taka kalpui a ni thin niin UNAMA chuan a sawi.
Mihring dikna chanvo palzutna hi province awm zawng zawng, 34-ah a thleng vek a. A tam ber chu Kabul, Kandahar leh Balkh province-ah a ni.
Afghanistan-a UN missions-a secretary-general leh UNAMA chief ni bawk aiawhtu, Roza Otunbayeva chuan Taliban-te chu ‘ngaihdamna an puan chu rintlaka kalpui turin’ a ngen.
“Chu chu dikna, inrintawnna leh Afghanistan-a muanna tluantling a awm theihna tur kawng a ni,” a ti.