Aizawl: August 18, 2023 atanga chin hriat loha bo, Lalremruata, kum 11 mi ruang ni ngeia hriat chhar.
Mamit atanga thudawn danin nimin chhun dar 12 bawr vel khan Mamit Field thlang tlak lam rama Lianmawii, High School veng ramah ruang chhar a ni a. He ruang hi chin hriat loh a bo, High School veng-a Lalvulmawii fapa, Lalremruata ni ngeia rin a ni.
Thudawnnain a sawi danin ruang hi a lo chhiat deuh tawh avangin amah ngei a nih leh nih loh chian a la ni lo va, Rinchhana (Lalremruata putea) chuan a ha hmai atanga a tupa ngei niin a hriat thu a sawi a. He thu buatsaih lai hian Aizawl atanga forensic lam thiamte nghah niin lak chhuah a la ni lo.
Naupang dai vakin mihring khup hmuin, inah hlauvin an tlan haw a, chuta tang chuan ruang hi hmuh a ni ta a. Hmuh a nih hian thuamhnaw inbel lo va, chhawlchhin niin an chhinna hnim hi a lo khawro tan tawh a, a khup vei lam a lang thei a ni.