Aizawl : Kumina MLA inthlan lo awm tura media kaihhnawiha thuneitu leh hmalatu tura Election Commission of India (ECI)-in a ruat ‘Champhai District Media Certification and Monitoring Committee (MCMC)’ chu nimin khan an Chairman, Champhai district election officer, Champhai Bawrhsap ni bawk James Lalrinchhana hovin an thukhawm a, tul leh pawimawh hrang hrang an sawiho.
Champhai district election officer, Champhai Bawrhsap ni bawk James Lalrinchhana chuan inthlan kaihhnawiha candidate leh party ten media hrang hrang kaltlanga political advertisement an tihchhuah chungchangah ECI-in dan leh inkaihhruaina mumal tak a neih thu sawiin, Champhai District MCMC chu hemi kengkawh tura din a nih thu a sawi.
MCMC chu inthlan kaihhnawih committee peng hrang hrang, a bikin Election Expenditure Monitoring (EEM) te nen hmalak tlan thin a tul tur thu a sawi a. Champhai district-ah inthlan dik leh felfai a awm theihna turin MCMC chu committee pawimawh ber te zing ami a nih thu sawiin, member-te chu an mawhphurna chiang taka lo inzir theuh turih a a chah bawk.
ECI-in inthlanpuiah candidate ten sum an hman theih zat a bituk a, an senso chhut na turin thil hrang hrang lei leh hman man bituk thin a ni. Chanchinbu, Radio, TV, leh social media kaltlanga advertisement rate pawh felfai taka duan lawk tur a nih avangin he committe hian Champhai district tana advertisement rate chun- gchang pawh sawiho- vin rate an bithliah a ni.
Electronic media hrang hrang – Radio, TV, social media te kaltlanga political advertisement tichhuak duh te chuan MCMC-ah phalna an dil hmasak a ngai a. MCMC hian Model Code of Conduct leh election dan dang bawhchhiatna a awm em tih te lo enfiah hmasain, a pawm phawt a ngai a. He certification kalpui dan tur te pawh hi nimina thutkhawm chuan an zirho bawk.