AZL: MPCC General Secretary TT Zothansanga hoin Congress party hruaitu thenkhatin rel kawng tur atana lei dawh mek chimna hmun hi an tlawh.
Mizoramin inkalpawhna awlsam zawk hmasawnna hmel hmuh nghakhlel taka an lo thlir laia chhiatna a thleng chu pawi an tiin, chhiat tawkte an tawrhpui tih an sawi a. Hnathawh tha tawk lo awm anga lang leh nakin huna chhiatna dang a thlen tawh lohna tura uluk taka hnathawk tur leh, hnathawh kal mek pawh uluk zawka enzui an tum thu Congress party hruaituten hnathawktute an hrilh.
MPCC hruaitute sawi danin, he hmuna hnathawh viltu, engineer-ten tuna lei chim hi ABCI Infrastructures Pvt. Ltd hnathawh a ni a. Helaiah hian pillar awmin ban pahnih inkar, meter 30 zo tawhin, pillar tawp ber inkar meter 70 thawh mek meter nga chauh awm tawhah zo lovin a elh liam ta a ni. Northeast Frontier Railways (NEFR) Engineer Saha chuan he chhiat tawhna laiah hian hnathawk 25 vel awmin ruang 17 hmuh tawh a ni a. Ruang pahnih thirin a delh zawn mek niin mi dang hi chin hriat lohin an awm niin a sawi a. An hotute helicopter-in an lo kal mek niin a sawi.
MPCC aiawha chhiatna thlenna hmun tlawhtute hian NEFR-in Khamrang leh Sihhmui inkar te, Khamrang Station atanga leiverh zawh tawh te, leidawh lai te, leidawh sang tak takte leh Mualkhang leh Sairang Rail Station siam hna kal lai mek te an en nghal bawk.
Rel kawng dawh chimna hmun tlawhtu Congress party hruaitute hi T.T Zothansanga, GS MPCC; Lalhriatrenga Chhangte, Vice Chairman Vigilance Department MPCC; C. Lalrochhara, MPCC Media Department leh Elizabeth Malsawmtluangi, Social Media Department-te an ni.