Furpui a thleng a, kan ram kawngte chu a buai leh ta nuai nuai mai. Kiltinah kawngchhia, kawngping, leimin chuan kan chanchinthar a luah leh ta zut zut a. Kawngchhia hi ngaiah kan neih tawh ni maite hian a lang. A mawhphurtute lah chuan ka mawhphurh a ni e ti lem lovin dan leh thupek kengkawhtute lam zawkin lirthei kal vel dan turah buaiin thuchhuah an siam leh ta zung zung zawk a. Hmun hrang hrangah kawngchhiat avanga mamawh ( essential commodities) harsatna thawm a ri nasa tan bawk.
Eng kan ti nge maw heti em em a kawngchhia buaipui ringawt mai sal atanga kan chhuah theih loh le. Kawng enkawltu ber department PWD hian mawhphurhna kan nei ani tiin ngaihtuahna han nei se kan harsatna zualpui hi chu a reh mai ang em? tih hi ngaihtuahnaah a awm fo thin. A bik takin kan chaw lakna kawngpui ber silchar kawngte hi chu a fur a thala tlang tha pangngaia enkawl tur chu kan ni. Vanduaina bik thleng a leimin rapthlakte hi chu lo hrethiam ta ila, Kawngchhuat enkawl loh vang liau liau a motor tlan hleithei lo khawpa kan han dah hi chu a mawhphurtu zawnchhuaha hremna in pek chu a hun ve tawh a ni. Kawng a zau a, a ping lo. A chhuat enkawl loh vang liau liau a harsatna thleng hi tu in nge ngaihthah a, fur thlen hmaa a chhiat dan tur hriat lawk theih reng ngaihsak lo lui tlat? Kan ram inenkawlnaah mipui tawrhna rapthlak thlentu an ni. Inhremna awm lo lutuk hi mawhphurhna ti ngaihthahtu ani tih i ngaihtuah ang u.
May thla khan kolasib district chanchinbumite chuan silchar kawngin furpuiah harsatna a tawk dawn tih an puang lawk reng a. Ngaihsak ani lova. Hriat lawk harsatna thleng tur ngaihsak duh miah lotute hi chuan mipui hi min zah miah lova. Engahmah min hmu lo tih a chiang khawp mai. Silchar kawng lo pawh Tlabung kawng chhe reu tawh lutukte hi a va rapthlak em. He kawng pawh hi furah harsatna thlen tur ani tih hriat lawk vek a ni. Nimin lawkah an bialtu Mla Nihar kanti Chakma lungawi lo chuan assembly sessionah a sawichhuak ta hial. Hetianga bialtu Mla meuhin rorelna sanga a thlen tawh hnu hi chuan a chhiatah hian mawhphurtu zawn a va hun em. Tlabung kawng pawh hi thal lai khan fur a daih loh tur thu nasa taka aupui a ni a. Thuneitute lam chuan barah an khawn lova. Tunah chuan Tlabung leh a chhehvelah chuan kawng a chhiat rei tawh avangin an tuar nasa ta khawp mai. Khawsak a harsa takzet a ni.
Hawh u, a bul tan nan kumin a ngaihthah vanga mipui tawrhna thlen tirtute zawng tal hi i hrem chhin teh ang u. Inhremna hian rah tha a chhuah hi a beiseiawm tlat a ni. Anmahni mimal a nghawng ve loh avanga hna ngaihtuah lotute hi i phin chhuak ila. A kaikuang hi Chemtatrawta thawnthu in chhui angin vawikhat kan chhuichhuah chuan nakumah tun kum ai hian kawngpui hi a tha ngei ngei ang tih hi a chiang a ni.