Liverpool chuan tun kartawpah an midfielder lakluh thar Alexis Mac Allister chu an chhawr thei dawn a. Red card a hmuh avanga match thum hrem a nih hnuah hlihsak a ni.
Argentine midfielder hi Inrinni a Bournemouth nen an inkhelh tumin referee Thomas Bramall chuan Ryan Christie nen ball an inchuh chu hlauhawm takin a tlawh niin a ngai a, minute 58-naah red card a phawrh.
Hremna hi kaltlangpui nise Mac Allister hian Newcastle United, Aston Villa leh Wolverhampton Wanderers te a hmachhawn thei dawn lo a ni.
Tun nipui a Brighton & Hove Albion atanga Liverpool in an lakluh Mac Allister hian a vawikhatna atana Anfield-ah a team thar tana a inkhelh tumin red card hi a hmu a. Inkhel zawhah an manager Jurgen Klopp-a chuan Football Association hnenah a hremna chu hlihsak turin an ngen dawn niin a lo sawi tawh.
FA hian Livepool ngenna hi Thawhlehni ah a ngaihtuahtu tur hnenah a thlen tawh thu an sawi a, Mac Allister red card pek hi a thutlukna dik tawk lo a ni tih a ngaihtuah nawn tuten an pawm.
Liverpool khingpui Bournemouth manager Andoni Iraola ngei pawhin red card niin a lang lo tiin an inkhelh zawhah a lo sawi tawh.
Klopp-a chuan, “Referee tana a lan dan tur ka hrethiam vek a, mahse ennawn lehin engmah hlauhawm a awm lo.” tiin a sawi tawh bawk.