Mizoram a taekwondo inelna lian 25th Mizoram Official Taekwondo Championship & 16th Mizoram Poomsae Championship 2023 chu Nilaini khan neih tan a ni a. TC Pachhunga, Vice Chairman, Sport & Youth Affair, ICT and Development chuan inelna hi a hawng.
Mizoram Amateur Taekwkndo Association buatsaih inelna hawngtu TC Pachhunga chuan Mizoram infiamna chuan tunhnaiah nasa takin hma a sawn a. Tun kum li chhungin lockdown avanga kan in kharkhip chung pawhin Mizoram tan infiammiten medal 515 lai an hawn tih a sawi a. Heng hlawhtlinnate hi hmasawn tur chuan a la tawk lo va, hriselna kan neih a ngai a, mahni in vawnthiamhlim leh ruihhlo laka kan in thiar fihlim hi a tul hle tiin infiammite a fuih.
Khuallian hian Taekwondo inkhelmi kalkhawmte chu zirna lam thlahthlam lova Mizoram ti hmingtha turin a chah tel.
Championship hawnna inkhawmOfficial Championship vawi 25na Player leh Referee te thutiam lakna hun an siam bawk.
Hawnna hunah hian infiammi inel turte leh referee ten thutiam lakna hun an nei a. Technical secretary in championship report kimchang a pe bawk.
Ni li awh tur Mizoram Official Championship khel tur hian district paruk atangin team 13 an tel a. Player 354 telin Kyorugi ah 272, Poomsae-ah 82 an in ziaklut.
Heng zinga 152 te chu hmeichhia niin Ngurnunsiami (ATA) leh Prisley Lalremtluangi (KDATA) , kum li te chu player tel zinga naupang ber an ni.
Inelna chi hnih Kyorugi leh Poomsae hmanga inel a ni ang a. Category hrang hrang Sub-Junior, Cadet, Junior leh Senior ah then niin heta gold medalist theuhte hian Mizoram Taekwondo Thiam ber Champion of Champions Title 2023 zawnna an nei nghal bawk ang.
He championship hi Inrinni thleng neih a ni ang.