Tunhnaiah hmeichhe boxer lar zingah mixed martial arts a inel tum an awm nual a, an la awm belh zel dawn niin a lang. Undisputed super middleweight champion Savannah Marshall chu a lar zingah MMA a inel tum thar ber a ni.
British boxer hian Professional Fighters League-ah contract a ziah tur thu a sawi a, boxing leh MMA-ah a inel ang. MMA-ah hian nakkumah a inel a rin thu a sawi.
“He thil hi kum engemaw zat chhung ka ngaihtuahna a awm a ni tawh, a chhan chu hmeichhe boxing hi hun engemaw ti lai khan hma a sawn tak tak dawn lo ni khan a lang.”
“Covid hma khan a ni a, UFC fighter Molly McCann hi ka thian hnai zing ami a ni a, a hlawhtlinna leh huntha hmuhte hi ka hriatpui ve vek a, UFC in hmeichhe inelna a kalpui dan ka hmu a, hei vang hian MMA a kal hi ka rilruah a awm tawh.” a ti.
13-1 record nei kum 32 mi Marshall hi rihna huang hnih a champion lai a ni a. BoxRec leh The Ring magazine ten khawvela hmeichhe middleweight fighter la inel awm zinga no.2 ah an dah.
Boxing lama a elpui thin Claressa Shields leh Amanda Serrano ten tunhnaiah hian MMA a inlan turin PFL-ah hian contract an ziak tawh.