Aizawl: August 21, 2023 atanga Mamit Truck Owner Association (MTOA)-in Mamit district-a kawng pawimawh ber, National Highway 108 an dangchat chhunzawm zel a. Vawiin lamah sorkar aiawhte nena an inbiak leh tum a ni.
Mamit atanga thudawn danin, Mamit-a lirthei hmanga eizawng ten National Highway 108 an dan chah (road block) chu thuneitute nen inremna an la neih theih loh avangin kawngpui dan chah chhunzawm zel a. Nimin lamah sorkar aiawhte nen inbe mah se, inremna an la nei hlei thei lo a ni.
MTOA leh sorkar thuneitute hi kawngpui dan chungchangah hian inbei thin mah se, inremna an la neih theih loh avangin kawngpui dan chhunzawm zel a la ni a. Nimina inbiaknaah, MTOA-in sorkara an thil phut hrang hrang zingah a tam zawkah inremna nei mah se, Darlak leh Bawngva inkar Teirei lei (bailey bridge) chu lirthei lian full load-in a zawh theih tura siam an phutna chungchang bikah hian an la inrem thei lo nia thudawn a ni.
Vawiin lamah MTOA leh sorkar thuneitute chu inbiak leh an tum nia thudawn a ni.