Aizawl: Higher & Education Minister Dr. R Lalthangliana’n Mizoram University Southern Campus dinna tura sorkar laipuia human resource development ministry-in post eng emaw zat phalsakna tur an dilna finance ministry-in a la rem tihsak loh chu an mutan a nih thu house a hrilh.
Nimina assembly fur thutkhawma Mamit bialtu MLA Er H Lalzirliana zawhna leh zawh belhna dangte a chhanaah a sawi a, Dr. Thangtea chuan rei tak chhung chu MZU Southern Campus awm ve se duhna a awm tawh thu a sawi a, thuneihna an chan hnu, kum 2020 khan a din phalna sorkar laipuia HRD ministry-in a pek tak thu a sawi a, a hmun tur pawh ram pek fel vek tawh a nih thu leh hei hi MZU lamin sorkar laipuiah an thlen thu sawiin DPR siamin deptt. 13 awm tur leh teaching leh non teaching thawktu tur te bakah a building sakna tur te leh post eng emaw zat siamna tur chu sorkar laipuiah an thehluh thu a sawi.
A thlawhtlinna erawh a la awm thei rih lo tih sawiin Dr. Thangtea chuan, sorkar laipui dawra Delhi a kal apiangin a bawhzui thin thu a sawi a, kumin kumtir lama a kala a thu hriat hnunung berah chuan HRD minister-in post eng emaw zat siam phalsak tur a an dilna chu finance ministy lamin an la remtih loh thu an lo hrilh a ni a ti a, hei hi an mutan a nih thu a sawi.
Hetihlai hian HRD ministry hian infrastructure lamah erawh boruak tha zawngin an lo hrilh thung tih sawiin MZU Southern Campus din a nih theih nan Mizoram sorkarin theihtawp a chhuahzui zel a, sorkar laipui lamah harsatna a la awm rih a ni a ti bawk.